चिखली (तालुका प्रतिनिधी) – तालुक्यातील अंत्री खेडेकर येथील प्रणव गजानन माळेकर याने श्री नेहरू विद्यालय, अंत्री खेडेकर येथून इयत्ता दहावीमध्ये ८६.८० टक्के गुण मिळवून विद्यालयामधून प्रथम येण्याचा मान मिळवला होता. त्यानिमित्ताने अनुराधा अभियांत्रिकी महाविद्यालय, चिखली यांच्यावतीने दिनांक १२ सप्टेंबररोजी बुलढाणा जिल्हा काँग्रेस कमिटीचे जिल्हाध्यक्ष तथा माजी आमदार राहुलभाऊ बोंद्रे यांच्याहस्ते त्याचा सत्कार करण्यात आला.
आपल्या यशाचे श्रेय प्रणवने त्याचे वर्ग शिक्षक व शिक्षक वृंद श्री नेहरू विद्यालय अंत्री खेडेकर तसेच आपले आई वडील यांना दिले आहे. सत्कारामुळे गावातील लोकसुद्धा त्याचे कौतुक करत आहेत. हा सन्मान प्राप्त करणारा तो अंत्री खेडेकरमधील एकमेव विद्यार्थी होता.