केंद्रीय मंत्रिमंडळात वर्णीसाठी राज्यातील सहा खासदारांना ‘पीएमओ’तून फोन!

– प्रफुल्ल पटेल, नारायण राणे, छत्रपती उदयनराजे भोसले अद्याप ‘वेटिंग’वर!
– आज सायंकाळी ७ वाजता मोदींच्या नेतृत्वातील ‘एनडीए’ सरकारचा शपथविधी

नवी दिल्ली (आवेश तिवारी) – राष्ट्रीय लोकशाही आघाडी (एनडीए)चे नेते नरेंद्र मोदी यांचा आज सायंकाळी ७ वाजून १५ मिनिटांच्या मुहुर्तावर पंतप्रधान पदाचा राष्ट्रपती भवनात शपथविधी होत असून, त्यांच्या मंत्रिमंडळात वर्णी लागणार्‍या खासदारांना पंतप्रधान कार्यालयातून (पीएमओ) फोन गेले आहेत. त्यात महाराष्ट्रातील सहा खासदारांचा समावेश आहे. तथापि, अजित पवार गटाचे प्रफुल्ल पटेल व भाजपचे नारायण राणे यांना अद्याप फोन गेलेले नाही, असे वृत्त हाती आले आहे. यामध्ये भाजपचे नितीन गडकरी (नागपूर), पियूष गोएल (मुंबई), रक्षा खडसे (जळगाव), व मुरलीधर मोहोळ (पुणे), शिंदे गटाचे प्रतापराव जाधव (बुलढाणा) व रिपाइंचे रामदास आठवले यांना फोन गेले असल्याचे भाजपच्या वरिष्ठस्तरीय सूत्राने सांगितले. तथापि, राष्ट्रवादी काँग्रेसच्या अजित पवार गटाचे प्रफुल्ल पटेल, नारायण राणे यांना मात्र हे वृत्त लिहिपर्यंत फोन गेलेले नव्हते. त्यामुळे या नेत्यांची केंद्रीय मंत्रिमंडळात वर्णी लागेल की नाही, याबाबत साशंकता आहे.

एनडीए सरकारचा आज सायंकाळी शपथविधी होत आहे. या सरकारमध्ये कोणाकोणाची वर्णी लागणार? याची चर्चा रंगली असतानाच महाराष्ट्रामधून सहा जणांना मंत्रिपद जवळपास निश्चित झाले आहे. ज्या खासदारांचा मंत्रिमंडळामध्ये समावेश करण्यात येणार आहे, त्यांना पंतप्रधान कार्यालयातून फोन केले जात आहेत. राज्यातील सहा खासदारांना आतापर्यंत फोन गेले आहेत. यातील चार जण भाजपचे आहेत. पियूष गोएल, नितीन गडकरी, रक्षा खडसेंना पंतप्रधान कार्यालयातून सर्वात आधी फोन आले. गोयल आणि गडकरींनी याआधीच्या मंत्रिमंडळांमध्ये महत्त्वाची खाती सांभाळली आहेत. रावेरमधून सलग तिसर्‍यांदा निवडून आलेल्या रक्षा खडसेंना पंतप्रधान कार्यालयाकडून निमंत्रण आलेले आहे. त्यामुख खडसे या मोदींच्या मंत्रिमंडळातील नवा चेहरा असतील. रिपाइंकडून रामदास आठवले यांना तिसर्‍यांदा मंत्रिपदाची संधी देण्यात आली आहे. दुसरीकडे, शिंदे गटाकडून प्रतापराव जाधव यांना मंत्रिपदासाठी फोन गेलेला आहे.
विशेष म्हणजे, नगरसेवक, पुण्याचे महापौर ते खासदार असा प्रवास करणार्‍या मुरलीधर मोहोळ यांनादेखील पंतप्रधान कार्यालयातून बोलावणे आलेले आहे. उपमुख्यमंत्री देवेंद्र फडणवीस यांचे निकटवर्तीय असलेले मोहोळ गेल्या काही दिवसांपासून दिल्लीतच होते. त्यांना केंद्रीय मंत्रिपदासाठी फोन गेल्याची माहिती सुत्रांनी दिली आहे. मोहोळ पहिल्यांदाच लोकसभेवर निवडून गेले आहेत. त्यांनी पुणे मतदारसंघात काँग्रेसच्या रविंद्र धंगेकर यांचा पराभव केला. गेल्या दोन दिवसांपासून अजित पवार गटाकडून प्रफुल पटेल यांच्या नावावर शिक्कामोर्तब झाल्याची चर्चा माध्यमांमध्ये रंगली होती. मात्र, प्रफुल पटेल यांना अजूनही कोणताही फोन गेलेला नाही. राष्ट्रवादीच्या नेत्यांनी दिल्लीत तळ ठोकला आहे. मात्र, अजूनही त्यांना मंत्रिपदाबाबत फोन आलेला नाही. त्यामुळे अजित पवार गट मंत्रिपदासाठी अजूनही वेटिंगवर असल्याचे दिसून आले.

राज्यामध्ये मंत्रिपदी देत असतानाच प्रादेशिक समतोल राखला जाणार आहे. याचा विचार केल्यास विदर्भातून नितीन गडकरी व प्रतापराव जाधव हे मंत्रिपदी असतील, तर मुंबईतून पियूष गोएल हे असणार आहेत. रामदास आठवले जातीय समीकरणातून मंत्रिपदी असतील, तर उत्तर महाराष्ट्रातून रक्षा खडसे यांना संधी देण्यात आली आहे. त्यामुळे आता पश्चिम महाराष्ट्र, कोकण आणि मराठवाड्यातून मंत्रिपद दिले जाते का? याकडेसुद्धा सर्वांचे लक्ष लागून आहे. विशेष म्हणजे, नारायण राणे यांना मंत्रिपदासाठी अजून फोन गेलेला नाही. उदयनराजे भोसले यांच्या नावाचीसुद्धा चर्चा होती. मात्र, अजून त्यांना फोन आलेला नाही.
——————

नरेंद्र मोदींच्या मंत्रीमंडळाची पहिली संभाव्य यादी :