‘तुम्हारा मान रखेंगे’; शाहांनी एकनाथ शिंदेंना १३ जागा सोडल्या; पण काही ठिकाणी उमेदवार बदलावे लागणार!
नवी दिल्ली (खास प्रतिनिधी) – महायुतीचे जागावाटप अखेर पूर्ण झाले असून, केंद्रीय गृहमंत्री तथा भाजपचे नेते अमित शाह यांचे मन वळविण्यात मुख्यमंत्री एकनाथ शिंदे यांना यश आले आहे. ‘तुम्हारा मान रखेंगे’, असे सांगत शाहांनी शिंदेंना १३ जागा सोडल्या; पण काही ठिकाणी उमेदवार बदलावे लागतील, असे शिंदेंना सांगण्यात आले आहे. अहमदनगर (दक्षिण)मधून डॉ. सुजय विखे, रावेरमधून रक्षा खडसे, जळगावमधून उन्मेष पाटील, बीडमधून प्रीतम मुंडे, सोलापूरमधून जयसिद्धेश्वर शिवाचार्य स्वामी या भाजपच्या पाच, तर शिंदे गटाच्या बुलढाणा येथून प्रतापराव जाधव, वाशिम-यवतमाळच्या भावना गवळी अशा महाराष्ट्रातील एकूण १२ विद्यमान खासदारांचे तिकीट कापले जाणार असल्याची माहिती विश्वसनीय सूत्रांनी दिली आहे.
मुंबईत शाहांसोबत झालेल्या बैठकीत शिंदे यांनी सुरुवातीला १८ जागांची मागणी केली होती. अखंड शिवसेनेने २०१९ मध्ये जिंकलेल्या जागांचा यात समावेश होता. नंतर ते १५ पर्यंत खाली आले. शाहा यांनी शेवटी नकार दिला, आणि दिल्लीतील बैठकीत १३ जागांवर सहमती दर्शवली, असे या सूत्राचे म्हणणे आहे. सुरूवातीला शाह यांनी शिंदे यांना कमी जागांवर राजी करण्याचा प्रयत्न केला होता. अधिकच्या जागा हव्या असतील तर त्यांच्या खासदारांनी भाजपच्या चिन्हावर निवडणूक लढवावी, असा आग्रह रेटला होता. परंतु, मनासारखे जागावाटप होत नसेल तर सरकारमधून बाहेर पडा, असा सूर शिंदे गटात निर्माण झाल्याने व तशी माहिती भाजपच्या नेतृत्वापर्यंत पोहोचल्याने रिस्क नको म्हणून शाह हे दोन पाऊले मागे आल्याचे सांगण्यात येत आहे. शिंदे गट उत्तर-पश्चिम मुंबईची जागा भाजपला देणार आहे. त्या बदल्यात शिंदे यांचा बालेकिल्ला असलेली ठाण्याची जागा त्यांना मिळेल, असेही या सूत्रांनी सांगितले.
————-