– भादोला गावातील शेख कुटुंबावर दुःखाचा डोंगर कोसळला!
बुलढाणा (जिल्हा प्रतिनिधी) – बुलढाणा ते खामगाव रोडवरील शहरापासून अवघ्या काही किलोमीटर अंतरावर भादोलानजीक दुचाकीवरून जाणार्‍या कुटुंबीयांना पाठीमागून भरधाव आलेल्या आयशर ट्रकने जोराची धडक दिल्याने झालेल्या भीषण अपघातात पती-पत्नीसह सासरे असे तिघेजण ठार झाले असून, पाचवर्षीय चिमुकला मात्र सुदैवाने बचावला आहे. अपघातानंतर आयशर ट्रकचालक घटनास्थळाहून पळून गेला. शेख फिरदोस शेख नईम व हमिदाबी शेख नईम या पती-पत्नीचा जागीच तर त्यांची सून शेख नईम शेख मुन्नी हिचा जिल्हा रूग्णालयात उपचारादरम्यान मृत्यू झाला. या दुर्देवी घटनेने एकच हळहळ व्यक्त केली जात आहे. तिघेही मृतक हे भादोला येथील रहिवासी आहेत. अपघातात वाचलेल्या शेख नमीर याच्यावर जिल्हा सामान्य रुग्णालयात उपचार सुरु आहेत.
एकाच दुचाकीवरून शेख कुटुंबीय भादोला गावाकडे बुलढाणा येथून दुचाकीवरून येत होते. बुलढाणा-खामगाव रोडवरील मोरे पेट्रोलपंपानजीकच्या पोखरी फाट्याजवळ फुले घेऊन जाणार्‍या आयशर ट्रकने त्यांच्या दुचाकीला पाठीमागून उडवले. या भीषण अपघातात दुचाकीवरील सासू, सासरे अन् सुनेचा दुर्देवी अंत झाला. सुदैवाने या अपघातात दुचाकीवरील पाच वर्षांच्या मुलाचा जीव वाचला. या अपघाताची माहिती मिळताच स्थानिकांनी घटनास्थळी धाव घेत मुलाला रुग्णालयात दाखल केले. दरम्यान, बुलढाणा पोलिसांनी घटनास्थळी धाव घेत, दिव्यसेवा प्रकल्पाच्या रूग्णवाहिकेने मृत व जखमींना जिल्हा शासकीय रूग्णालयात हलवले. पोलिसांनी या प्रकरणी आयशर चालकाविरोधात गुन्हा हा दाखल करुन घेतला आहे. परिसरातील सीसीटीव्हीच्या आधारे पोलिस त्याची माहिती काढत असून, त्याचा शोध सुरू आहे.
—————-