बिबी (ऋषी दंदाले) – भरधाव ट्रकने दुचाकीला जोरदार धडक दिल्याने झालेल्या भीषण अपघातात सुलतानपूर येथील दुचाकीस्वार युवक उपचारादरम्यान ठार झाला असून, अन्य एकजण गंभीर जखमी झालेला आहे. त्याच्यावर जालना येथील खासगी रूग्णालयात वैद्यकीय उपचार सुरू आहेत. मंगळवारी दुपारी साडेचार वाजता हा दुर्देवी अपघात घडला. या घटनेने सुलतानपूर गावावर शोककळा पसरली आहे.
सविस्तर असे, की मंगळवारी (दि.२२) दुपारी साडेचार वाजता बिबीहून मेहकरकडे जाणार्‍या मालवाहू ट्रक क्रमांक एमएच १६ सीडी ३२०८ने बिबीपासून जवळच असलेल्या ब्राह्मण चिकना गावाजवळ दुचाकीला जोरदार धडक दिली. या भीषण अपघातात विष्णू पुंजाराम गायकवाड (वय वर्ष २८) व अनिल रामेश्वर हरणे (वय वर्ष ३०) दोघेही राहणार सुलतानपूर हे दोघे गंभीर जखमी झाले. त्यांना तातडीने पुढील उपचारासाठी बिबी ग्रामीण रुग्णालय येथे दाखल करण्यात आले. परंतु दोघांचीही प्रकृती चिंताजनक असल्याने त्यांना पुढील उपचारासाठी जालना येथे हलवण्यात आले. परंतु अनिल रामेश्वर हरणे (वय ३०) याच्या डोक्याला गंभीर दुखापत झाली असल्यामुळे त्याचा काल रात्री उपचारादरम्यान मृत्यू झाला. या अपघाताबद्दल हे वृत्तलिहिपर्यंत गुन्हा नोंद करण्यात आला नव्हता. तरी पुढील तपास बिबी पोलीस स्टेशनचे ठाणेदार सोनकांबळे यांच्या मार्गदर्शनाखाली हेकॉ कायंदे व त्यांचे रायटर अर्जुन सांगळे हे करीत आहेत.