मेरा बुद्रूक, ता. चिखली (प्रतिनिधी) – चिखली तालुक्यातील मेरा बुद्रुक येथील शेतकरी परशुराम वामन पडघान यांची कन्या कु.प्रगतीने आज, दिनांक १४ जून २०२३ रोजी जाहीर झालेल्या नीट परीक्षेच्या निकालात नीट परीक्षेत ७२० पैकी ६५६ गुण मिळवीत घवघवीत यश संपादन केले.
कु.प्रगती हिने संपूर्ण देशातून ५३२१ वी रँक तर ओबीसी कॅटेगरीतून १८२१ रँक मिळवत ग्रामीण भागातील विद्यार्थीसुद्धा बुद्धिमत्ता व मेहनतीच्या बाबतीत शहरी भागातील विद्यार्थ्यांच्या बरोबरीत असल्याचे दाखवून दिले. प्रगतीने दहावीमध्ये ९७ टक्के तर बारावीत ९१ टक्के गुण मिळवले होते. मेरा बुद्रुक सारख्या ग्रामीण गावातील प्रगतीने मिळवलेले हे फार मोठे यश आहे. तिने मिळवलेल्या यशाबद्दल मेरा बुद्रुक परिसरातून तिच्यावर अभिनंदनचा वर्षाव होत आहे. कु.प्रगतीने आपल्या यशाच्या श्रेय आई वडील व गुरुजनांना दिले आहे.