BREAKING NEWS! बारावीचा गणित पेपरफुटीमागे मुंबईतून हलली सुत्रे?; मोठे रॅकेट सक्रीय?

– १० ते १२ हजार रुपये घेऊन व्हाटसअप ग्रूपमध्ये मिळत होती एण्ट्री?
– दोन शिक्षकही पोलिसांच्या ताब्यात, डीवायएसपी यामावर यांच्या कुशल तपासातून अनेक धक्कादायक बाबी उघड होणार!

सिंदखेडराजा/मुंबई (विशेष प्रतिनिधी) – साखरखेर्डा पोलिस ठाणेहद्दीतील राजेगाव येथील यशवंतराव चव्हाण माध्यमिक विद्यालय व भास्करराव शिंगणे कला महाविद्यालयाच्या परीक्षा केंद्राबाहेरून पेपर सुरू होण्याआधी अर्धातास अगोदर गणिताच्या पेपरची दोन पाने व्हाटसअपवर व्हायरल झाली होती. विशेष बाब म्हणजे, राजेगावप्रमाणेच मुंबईतील एका परीक्षा केंद्रावरूनदेखील बरोबर १० वाजून १७ मिनिटांनी हा पेपर एका व्हाटसअपग्रूपवर व्हायरल झाला होता. त्यामुळे राजेगाव येथील पेपरफुटीचे मुंबई कनेक्शन चव्हाट्यावर आले असून, एका विद्यार्थ्यांकडून १० ते १२ हजार रुपये घेऊन हा पेपर फोडण्यात आल्याचा संशय निर्माण झालेला आहे. या पेपरफुटीच्या रॅकेटच्या मुळाशी जाण्याचा निर्धार कर्तव्यकठोर अधिकारी म्हणून ओळखले जाणारे डीवायएसपी यामावार यांनी केला आहे. त्यांच्या नेतृत्वात साखरखेर्डा पोलिसांनी केलेल्या सखोल तपासात, या पेपरफुटीप्रकरणामध्ये पाच जणांना अटक करण्यात आली आहे. यामध्ये दोन शिक्षकांनादेखील ताब्यात घेण्यात आलेले आहे. हे सर्वजण शेंदूरजन, बिबी, किनगावजट्टू, व भंडारी या गावातील आहेत.

राजेगाव येथील पेपरफुटीप्रकरणाचे राज्यस्तरीय धागेदोरे उघडकीस येण्याची शक्यता असून, हे एक मोठे रॅकेट असल्याचा संशय पोलिसांना आहे. मुंबईतील दादर येथील डॉ. अ‍ॅण्टोनिओ डिसिल्वा हायस्कूल आणि ज्युनिअर कॉलेजमधील एका विद्यार्थ्याच्या मोबाईलमधून या पेपरचा काही भाग मुंबई पोलिसांनी जप्त केला आहे. त्यानंतर हे प्रकरण मुंबई पोलिसांनी गुन्हे शाखेकडे सोपविले आहे. या पेपरफुटीचे धागेदोरे राजेगाव पेपरफुटी प्रकरणाशी असल्याचा संशय पोलिसांना आहे. बारावीच्या विद्यार्थ्यांकडून प्रत्येकी १० ते १२ हजार रुपये घेऊन पेपर फोडण्यात आल्याचा प्राथमिक संशय असून, याबाबत मुंबई गुन्हे शाखा व डीवायएसपी यामावार यांच्या नेतृत्वात साखरखेर्डा पोलिस कसून तपास करत आहेत. काही महत्वपूर्ण पुरावे पोलिसांच्या हाती लागले आहेत.

मुंबईतील दादरमध्ये गणिताचा पेपर सुरू होण्याआधी १० वाजून १७ मिनिटांनी एकाच व्हाटसअप ग्रूपवर या पेपरची दोन पाने व्हायरल झाली होती. बरोबर त्याच वेळेस राजेगाव (ता. सिंदखेडराजा) येथील काही विद्यार्थ्यांना हा पेपर मिळाला होता. त्यामुळे या पेपरफुटीच्या कनेक्शनचाही तपास पोलिस करत आहेत. तसेच, राज्यभरात आणखी कुठे कुठे अशाच पद्धतीने पेपर फुटला? याचाही तपास मुंबई पोलिस करत आहेत. पेपरफुटीसाठी ज्या व्हाटसअप ग्रूपचा वापर करण्यात आला त्यात एकूण ९० जणांचा समावेश होता. त्यात काही शिक्षक, विद्यार्थी आणि इतरही काही व्यक्ती होते. प्रसारमाध्यमांनी पेपरफुटीची बातमी प्रसारित करताच हा व्हाटसअप ग्रूप डीलिट करण्यात आला. तरीदेखील स्कॉटलंड यार्ड पोलिसांशी तुलना होणार्‍या व जगातील सर्वांत शार्प असलेल्या मुंबई पोलिसांनी हा डीलिट केलेला ग्रूपही शोधून काढला असल्याची माहिती हाती आली आहे. त्यामुळे अनेकजण लवकरच पोलिसांच्या जाळ्यात अडकणार आहेत. त्यासाठी मुंबई व बुलढाणा सायबर पोलिसदेखील कसून कामाला लागले आहेत.

पोलिस दलातील वरिष्ठ सूत्राने ‘ब्रेकिंग महाराष्ट्र’ला दिलेल्या माहितीनुसार, व्हॉट्सअप ग्रुप बनवून कॉपी केली जात होती. एकूण ९० जणांचा ग्रूप बनवण्यात आला होता. यामार्फत पास करून देण्यासाठी विद्यार्थ्यांकडून प्रत्येकी १० ते १२ हजार रुपये घेतले गेले असावेत, असा संशय आहे. या प्रकरणात राजेगाव शेजारील गावांमधील पाच जणांना अटक करण्यात आली आहे. तर शाळेतील दोन शिक्षकांनादेखील पोलिसांनी ताब्यात घेतले आहे. त्यांच्यावर कलम २४० आणि १२० ब अंतर्गत गुन्हा दाखल करण्यात आला आहे. दरम्यान, हा पेपर जर राज्यभर लीक झाला असेल तर मात्र परीक्षा बोर्डाला तो पुन्हा घेतल्याशिवाय गत्यंतर नाही, अशी माहिती शिक्षण विभागातून मिळत आहे.

बोर्डाच्या विभागीय सचिवांनी घेतली बुलढाण्याच्या वरिष्ठ अधिकार्‍यांची बैठक, केल्या महत्वाच्या सूचना!

दरम्यान, अमरावती बोर्डाचे सचिव उल्हास नरड यांनी पत्रक काढून सिंदखेडराजा तालुक्यातील केंद्र क्रमांक ६०१, ६०२, ६०६, ६०८ ६०९ या पाच परीक्षा केंद्रावरील केंद्रसंचालक व रनर यांना तत्काळ बदल करून इतर शिक्षकांची नियुक्ती करावी व संबंधितांना आदेश निर्गमित करण्यास सांगितले आहे. तसेच, तालुक्यातील इयत्ता १२ वीच्या केंद्रसंचालक यांची ३ मार्च रोजी सायंकाळी तत्काळ बैठक घेऊन तेजराव काळे सहसचिव विभागीय परीक्षा मंडळ अमरावती यांच्या उपस्थितीमध्ये त्यांनी केंद्र अध्यक्ष व रनर यांना सूचना दिल्या आहेत. केंद्र अध्यक्ष तसेच रनर यांनी काळजी घेऊन परीक्षा केंद्रावर परीक्षा सुरळीत पडण्यासाठी योग्य की खबरदारी तसेच परीक्षा केंद्राच्या आवारामध्ये बाहेरील व्यक्तीला प्रवेश दिला जाणार नाही. विद्यार्थ्यांना भयमुक्त व कॉपीमुक्त परीक्षा सुरळीत पाडण्याच्या तसेच यासह इतर सूचना देण्यात आल्या आहेत. यावेळी शिक्षणाधिकारी प्रकाश मुकुंद, शिक्षण उपनिरीक्षक जगन मुंढे, तालुका कृषी अधिकारी वसंतराव राठोड, सिंदखेडराजा गटशिक्षणाधिकारी रंगनाथ गावडे, देऊळगावराजा गटशिक्षणाधिकारी दादाराव मुसदवाले यांच्यासह तालुक्यातील केंद्र संचालक व रनर उपस्थित होते.
—————————-