चिखली (विशेष प्रतिनिधी) – तालुक्यातील रानअंत्री येथील नवनिर्वाचित सरपंच तात्याराव झाल्टे यांनी आपल्या विजयाच्या स्मृती आयुष्यभर कायम रहाव्यात म्हणून चक्क नवीन ट्रॅक्टर घेतले. त्यांच्या या ट्रॅक्टरचे गावकर्‍यांनी कौतुक केले आहे. विशेष म्हणजे, अवघ्या पाच मतांनी त्यांनी अतितटीच्या निवडणुकीत विजय संपादन केला आहे.
रानअंत्री येथील ग्रामपंचायतची निवडणूक चुरशीने पार पडली आहे. सरपंचपदाचे दावेदार तात्याराव झाल्टे यांना निवडणूक आयोगाने तीन ते चार निशाणी सूचविली होती. त्यात, नारळ, ऑटो, कप बशी आणि ट्रॅक्टर या निवडणूक निशाणीचा समावेश होता. परंतु तातेराव झाल्टे हे हाडाचे शेतकरी असल्यामुळे त्यांनी ट्रॅक्टर निशाणी निवडली होती. ग्रामस्थांनीदेखील या ट्रॅक्टर निशाणीसमोरील बटन दाबून त्यांना अटीतटीच्या निवडणुकीमध्ये अवघ्या पाच मताने विजयी केले आहे. त्यामुळे या विजयाची आठवण आयुष्यभर रहावी म्हणून झाल्टे यांनी आज चक्क ट्रॅक्टरच खरेदी केले.