लोणार (विनोद पाटील तेजनकर) – भरधाव आयशर ट्रकने दुचाकीस्वारास ठोकरल्याने झालेल्या भीषण अपघातात खळेगाव येथील दीपक नागरे (वय २५) या अविवाहित तरुणाचा जागीच मृत्यू झाला. सुलतानपूर-औरंगाबाद मार्गावरील अंजनी खुर्द बसथांब्यानजीक ही दुर्देवी घटना घडली. या घटनेने खळेगाव परिसरात एकच हळहळ व्यक्त होत आहे.
सविस्तर असे, की दीपक नागरे हा तरुण आपल्या नव्या कोर्‍या दुचाकीने अंजनी खुर्द बसथांब्याजवळून सुलतानपूरकडून खळेगावकडे जात असताना, औरंगाबादकडून सुलतानपूरकडे जाणार्‍या भरधाव जाणार्‍या आयशर ट्रकने त्याला समोरून जोरदार ठोकरले. आज सायंकाळी सहा वाजेच्या सुमारास हा भीषण अपघात झाला. या अपघातात दीपक याचा जागीच मृत्यू झाला.
विशेष म्हणजे, त्याने एचएप डिलक्स ही नवीकोरी दुचाकी नुकतीच घेतली होती. तिचा अजून नंबरही आला नव्हता. तरी, या अपघातात दुचाकी चक्काचूर तर झालीच परंतु, दीपक नागरे याचा बळी गेला. घटनेची माहिती कळताच, मेहकर पोलिस ठाण्याचे कर्मचारी घटनास्थळी पोहोचले व दीपक नागरे याला नजीकच्या दवाखान्यात हलवले. परंतु, त्याचा मृत्यू झाला होता. पोलिसांनी आयशर ताब्यात घेतला असून, चालकालाही ताब्यात घेण्याची व गुन्हा दाखल करण्याची प्रक्रिया रात्री उशीरापर्यंत सुरु होती. या घटनेने एकच खळबळ उडाली असून, परिसरात हळहळ व्यक्त होत आहे.
——————