चिखला फाट्यावर भरधाव ट्रकने दोघांना चिरडले; दोघेही जागीच ठार!

बिबी (ऋषी दंदाले) – भरधाव असलेल्या ट्रकने दुचाकीला ठोकर देत त्यावरील दोघा दुचाकीस्वारांना चिरडल्याची थरारक दुर्घटना बिबी पोलिस ठाण्यापासून हाकेच्या अंतरावर असलेल्या चिखला फाटा येथे आज रात्रीच्या सुमारास घडली. या दोन्ही दुचाकीस्वारांचा जागीच मृत्यू झाला होता. त्यांचे मृतदेह बिबी येथील ग्रामीण रूग्णालयात आणण्यात आलेले आहेत. दोघेही मृतक हे पिंपरी खंदारे येथील रहिवासी असून, बंडू चौधर व दत्तात्रय चौधर अशी त्यांची नावे आहेत. या घटनेने पिंपरी खंदारे गावावर एकच शोककळा पसरली होती.

सविस्तर असे, की बंडू शिवाजीराव चौधर व दत्तात्रय बालाजी चौधर (रा. पिंपरी खंदारे) हे मुंबई-नागपूर राष्ट्रीय महामार्गाने आपली दुचाकी क्रमांक (एमएच २८ एक्यू ५३५०) ने गावी पिंपरी खंदारे इकडे चालले होते. त्यांना मेहकरकडून आलेल्या भरधाव ट्रक (क्रमांक एमएच १२ टीव्ही २०६७ ने बिबीजवळील चिखला फाटा येथे समोरून जोरदार ठोकर दिली. दुचाकीवरील दोन्हीही दुचाकीस्वार हे ट्रकखाली अक्षरशः चिरडले गेले. त्यामुळे त्यांचा जागीच मृत्यू झाला होता. यावेळी ग्रामस्थांनी धावाधाव करून अपघातग्रस्तांना ग्रामीण रुग्णालय येथे आणले. परंतु, डॉक्टरांनी त्यांना तपासून मृत घोषित केले. तर ट्रकचालक हा घटनास्थळावरून पळून गेला होता. या प्रकरणी गुन्हा दाखल करण्याची प्रक्रिया बिबी पोलिस ठाण्यात सुरू होती. तर पळून गेलेल्या ट्रकचालकाचा ठाणेदार संदीप पाटील यांच्या मार्गदर्शनात पोलीस कर्मचारी शोध घेत आहेत.