– भरधाव टिप्परचालक ग्रामस्थांच्या जीवावर उठले, परिसरातील सलग दुसरा अपघात
मेहकर (अनिल मंजुळकर) – रस्त्याच्या कडेने शेतात जाणार्या ३५वर्षीय युवकाला भरधाव टिप्परने जोरदार धडक देऊन उडविले व घटनास्थळावरून पसार झाल्याचा धक्कादायक प्रकार आज (दि.२०) सकाळी ११ वाजेच्या सुमारास सिद्धांत आश्रम वरवंड येथे घडला. या युवकाची प्रकृती चिंताजनक असून, त्याच्यावर वैद्यकीय उपचार सुरू आहेत. पोलिस या टिप्पर चालकाचा कसून शोध घेत आहेत.
सविस्तर असे, की वरवंड येथील युवक संतोष रामचंद्र खुरद (वय ३५) हा सकाळी रस्त्याने शेतात जात होता. त्याचवेळी समोरून अतिशय वेगात येणार्या टिप्परने संतोषला जोरदार धडक देऊन उडविले. हा युवक रस्त्यावर गंभीर जखमी अवस्थेत पडलेला असतानादेखील टिप्पर चालक तेथून वाहनासह पसार झाला. आजूबाजूला काही युवक बकर्या चारत होते. त्यांनी घटनास्थळी धाव घेतली व गंभीर जखमी असलेल्या संतोष खुरद यांच्या कुटुंबीयांना या अपघाताची माहिती दिली. ग्रामस्थ व कुटुंबीयांनी तातडीने त्याला खासगी दवाखान्यात हलवले. या अपघाताबाबत पोलिसांनादेखील माहिती कळताच त्यांची घटनास्थळी धाव घेतली होती. टिप्पर चालकाचा कसून शोध घेतला जात आहे. दरम्यान, मागील महिन्यातसुध्दा भरधाव टिप्परने लावणा येथील पती-पत्नीला उडविले होते. त्यामुळे भरधाव वेगात टिप्पर चालविणार्या वाहकांवर पोलिसांनी कारवाई करावी, अशी मागणी परिसरातील ग्रामस्थ करत आहेत.
————-