– लाडक्या बहिणींच्या जिव्हाळ्याची जाणीव माझ्यासाठी प्रेरणा – श्वेताताई महाले
चिखली (तालुका प्रतिनिधी) – त्या गावात येताच माय-माऊल्यांचा घोळका त्यांच्याभोवती जमा होतो, वयोवृद्ध महिला तोंड भरून आशीर्वाद देतात, गृहिणी औक्षण करून ओवाळतात तर तरुणी शुभेच्छांचा वर्षाव करतात. एकूणच काय तर जमलेली प्रत्येक माता भगिनी ही त्यांच्याप्रति असलेला आपला जिव्हाळा आणि उत्कटता व्यक्त करत असते. हे चित्र आहे चिखली विधानसभा मतदारसंघातील महायुतीच्या उमेदवार आ. श्वेताताई महाले यांच्या जनआशीर्वाद दौर्‍यातील. या दौर्‍यादरम्यान श्वेताताईंना महिला मतदारांकडून मिळणारा उदंड आणि उत्स्फूर्त प्रतिसाद श्वेताताईंच्या विजयात महिला मतदारांचा सिंहाचा वाटा असेल, हेच आवर्जून सांगत आहे. माता-भगिनींच्या या अतूट आणि अलोट प्रेमाची जाणीव श्वेताताईंनादेखील असून, त्याबद्दल त्यांच्या तोंडून निघणारे कृतज्ञतेचे उद्गार पाहता, त्यांच्यात आणि महिला मतदारांमध्ये जुळलेले भावनिक ऋणानुबंध स्पष्टपणे जाणवतात.
महाराष्ट्र विधानसभेत चिखली मतदारसंघाचे प्रतिनिधित्व करण्याची पुन्हा संधी मिळावी, यासाठी आ. श्वेताताई महाले या महायुतीतर्पेâ भारतीय जनता पक्षाच्या उमेदवार म्हणून सलग दुसर्‍यांदा जनतेचा कौल आजमावत आहेत. निवडणूक प्रचारानिमित्त आयोजित जनआशीर्वाद दौर्‍यातून मतदारसंघातील ग्रामीण भागात त्या सध्या फिरत असून, प्रत्येक जिल्हा परिषद सर्कलमध्ये गावोगावी जाऊन मागील अडीच वर्षात आपण केलेल्या विकासकामांची पोचपावती श्वेताताई जनता जनार्दनाकडून मागत आहेत. अबालवृद्धासह प्रत्येक वयोगटातील मतदारांचा त्यांना उदंड प्रतिसाद लाभत असून, यामध्ये महिला वर्गाचा दिसणारा उत्साह अधिक ठळकपणे जाणवतो. गेल्या निवडणुकीत मतदारांनी दिलेल्या भरभरून आशीर्वादाचे ऋण चुकवण्यासाठी आ. श्वेताताई महाले यांनी कोट्यवधी रूपयांचा विकासनिधी केवळ अडीच वर्षात चिखली मतदारसंघात आणला, व त्याद्वारे जास्तीतजास्त विकासकामे केली. ग्रामीण भागातील महिलांच्या डोक्यावरील हंडा उतरविण्यासाठी जलजीवन मिशनद्वारे सुमारे १०० गावांमध्ये कायमस्वरूपी पाण्याची व्यवस्था करण्याचा प्रयत्न केला. हा प्रयत्न महिला मतदारांना अतिशय भावला असून ‘आमच्या डोक्यावरचा हंडा उतरवणार्‍या श्वेताताईंना आम्ही पुन्हा आमदार करणार’ अशा शब्दात महिला मतदार आपली प्रतिक्रिया व्यक्त करतात.
राज्यातील महायुती सरकारने महिला सक्षमीकरणाच्या भूमिकेतून मुख्यमंत्री माझी लाडकी बहीण योजना सुरू केली, चिखली मतदारसंघातील प्रत्येक पात्र महिला लाभार्थीला या योजनेचा लाभ मिळावा यासाठी आ. श्वेताताई महाले यांनी जे प्रयत्न केले ते खरोखरच उल्लेखनीय आहेत. त्यामुळेच या मतदारसंघातील ६० हजारापेक्षा जास्त महिलांना लाडकी बहीण योजनेमधून आर्थिक मदत मिळत आहे. ग्रामीण भागातील महिला मतदारांना श्वेताताईंनी केलेल्या या प्रयत्नांची जाण आहे; म्हणूनच ज्या ज्या गावात श्वेताताई जातात तेथे त्यांचे स्वागत करण्यासाठी सर्वात पुढे माता भगिनी असतात. आमच्यासाठी झटणार्‍या श्वेताताईंनाच आम्ही पुन्हा संधी देणार, आमच्यासह आमच्या संपूर्ण कुटुंबाचे मतदान करून विधानसभेत पाठवणार, असा निर्धार ग्रामीण भागातील महिला मोठ्या संख्येने व्यक्त करताना जनआशीर्वाद दौर्‍यात पाहायला मिळतात.
मातृत्व, कर्तृत्व आणि नेतृत्व यांचा त्रिवेणी संगम म्हणजे नारीशक्ती होय. याच नारीशक्तीचा एक अंश म्हणून मी चिखली मतदारसंघाचे प्रतिनिधित्व राज्याच्या विधानसभेत करत आहे. या माध्यमातून मला माझ्या परिसराचा विकास करण्याची संधी मिळाली असून, या संधीमध्ये महिला मतदारांचा मोठा सहभाग असल्याची मला जाणीव आहे. या जाणिवेपोटी ग्रामीण भागातील बहुजन समाजातील माझ्या आई बहिणींच्या प्रत्येक मागणीची दखल घेणे हे मी माझे कर्तव्य समजते. 