सिंदखेडराजा (तालुका प्रतिनिधी) – भारतीय जनता पक्षाचे आमदार तथा धनगर समाजाचे नेते गोपीचंद पडाळकर यांच्यावर मराठा समाजाच्या काही तरूणांनी काल चप्पलफेक केली होती. या घटनेचा तीव्र निषेध नोंदवत सिंदखेडराजा येथील खामगाव-जालना मार्गावर रस्ता रोको आंदोलन करण्यात आले. यावेळी चप्पलफेक करणार्‍यांना तातडीने अटकेची मागणी करण्यात आली.
भाजपचे आमदार व धनगर समाजाचे नेते गोपीचंद पडळकर यांच्यावर शनिवारी झालेल्या चप्पलफेकचे पडसाद बुलढाणा जिल्ह्यातही उमटले. सिंदखेडराजा येथे खामगाव-जालना महामार्गावर रविवारी रास्ता रोको करण्यात आला. यावेळी जोरदार निदर्शने करण्यात आली. चप्पलफेक करणार्‍या आरोपींना तत्काळ अटक करून कारवाई करण्यात यावी, अशी मागणी करण्यात आली.
यावेळी भाजप प्रवक्ते विनोद वाघ यांनी सांगितले की, आजच्या आंदोलनात केवळ धनगर बांधवच नव्हे तर समस्त ओबीसी घटक सहभागी झाले आहेत. यावेळी त्यांनी मराठा आरक्षणाचे प्रणेते मनोज जरांगे यांच्यावर टीका केली. जरांगे रोज भूमिका बदलत असल्याचा आरोप त्यांनी केला. तेही महाराष्ट्रात फिरत असल्याने त्यांच्यावरही चप्पलफेक होऊ शकते, असेही ते म्हणाले.
————-