सोन्याचे दागिन्यांच्या लोभ आला अन् बापलेकांनी वृध्द महिलेचा काढला काटा

मलकापूर(ब्रेकिंग महाराष्ट्र): मलकापूर नगरपरिषदेतून सेवानिवृत्त वृध्द महिलेच्या अंगावरील सोन्याचे दागिने पाहून घराशेजारी राहणाऱ्या बापलेकांचा सोन्याच्या दागिन्यांच्या मोह आवरला नाही. याच मोहापायी या क्रूर बापलेकांनी संधी साधत महिलेचा काटा काढला . एवढ्यावर न थांबता त्यांनी कोणाला संशय येवू नये म्हणून मृतदेह प्लॅस्टिकच्या कॅरीबॅगमध्ये भरून जळगाव जिल्ह्यात एका पुलाखाली फेकून दिला. ही घटना गणपती नगर उघडकीस आली. या घटनेमुळे एकच खळबळ उडाली आहे

मलकपुरच्या गणपती नगर भागातील रहिवासी प्रभा माधव फाळके वय ६५ असे ह्या मलकापूर नगरपरिषदेतून सेवानिवृत्त झाल्या आहेत. दरम्यान 27 ऑगस्ट रोजी प्रभा फाळके ह्या परिसरातील मंदिरात पूजेसाठी गेल्या होत्या. मात्र प्रभा फाळके रात्री पर्यंत घरी परतल्या नाहीत. त्यामुळे प्रभा फाळके यांचा शोध घेतला. सगळीकडे शोधूनही त्या मिळून न आल्याने मलकापूर शहर पोलिस ठाण्यात तक्रार देण्यात आली होती. या प्रकरणी मलकापूर पोलिसांनी हरविल्याची नोंद दाखल केली होती. आणि पुढील तपास मलकापूर पोलीस करीत होते. दरम्यान 29 ऑगस्ट रोजी जळगाव खान्देश जिल्ह्यातील मुक्ताईनगर ते बऱ्हाणपूर मार्गावर कुंड गावाजवळ पुलाच्या खाली प्लॅस्टिकच्या पिशवीत एका महिलेचा मृतदेह कुजलेल्या अवस्थेत सापडला होता. मुक्ताईनगर पोलिसांनी “त्या” मृतदेहाची ओळख पटविण्याचे आवाहन केले होते. मात्र लवकर ओळख न पटल्याने पोलिसांनी तिथेच अंत्यविधी उरकला . यावेळी या प्रकरणी मुक्ताईनगर पोलीस स्टेशन मध्ये अज्ञात इसमाविरुद्ध खुनाचा गुन्हा दाखल करण्यात आला होता. या खून प्रकरणाचा मुक्ताई नगर पोलीस तपास करीत असताना प्रभा फाळके यांच्या मुलाने मुक्ताईनगर पोलिसांनी पाठवलेल्या फोटोवरून तो मृतदेह आपल्या आईचाच असल्याचा दावा केला. त्यामुळे पोलिसांनी त्यादृष्टीने तपासाची चक्रे फिरवली. मुक्ताईनगर पोलीस तसेच जळगावच्या स्थानिक गुन्हे शाखेचे पथकाने प्रकरणाच्या तपासासाठी मलकापूर गाठले. या बाबत मलकापूर शहरातील महाकाली नगर, बसस्थानक, गणपती नगर व अन्य ठिकाणी चौकशी केली. दरम्यान पोलिसांना तपासादरम्यान खून प्रकरणाशी सबंधित महत्वाचे धागेदोरे हाती लागले. गुप्त माहितीवरून पोलिसांनी मृतक प्रभा फाळके यांच्या घराशेजारील विश्वास भास्कर गाढे वय 41 व भार्गव विश्वास गाढे वय 21 या दोघांना ताब्यात घेतले. यावेळी पोलिसांनी दोघांची चौकशी केली असता त्यांनी उडवाउडवीची उत्तरे दिली. मात्र पोलिसांनी दोघांना पोलीसी खाक्या दाखवताच बापलेकांनी सोन्याचे दागिन्यांसाठी प्रभा फाळके यांचा खून केल्याची कबुली दिली. त्यानंतर पोलिसांनी आरोपी बापलेकांकडून प्रभा फाळके यांच्या अंगावरील सोन्या चांदीचे दागिने , बांगड्या, २ गोफ असा दोन लाखांचा मुद्देमाल जप्त केला आहे. पुढील तपास पोलीस करीत आहे