मतदार यादी पुनरीक्षणाच्या कामात हलगर्जीपणा खपवून घेतला जाणार नाही!

-सिंदखेडराजात आढावा बैठक; उपविभागीय अधिकारी प्रा. संजय खडसे यांचे कामाचा वेग वाढविण्याचे स्पष्ट निर्देश, मतदारांना बीएलओंशी संपर्क साधण्याचे आवाहन

सिंदखेडराजा (अशोक इंगळे) : विशेष सखोल पुनरीक्षण (SIR) कार्यक्रमांतर्गत मतदार यादीच्या ऑनलाइन डिजिटायझेशनचे काम संथ गतीने करणाऱ्या मतदान केंद्रस्तरीय अधिकाऱ्यांचा (BLO) आढावा घेण्यासाठी तहसील कार्यालयातील निवडणूक विभागात महत्त्वपूर्ण बैठक पार पडली. उपविभागीय अधिकारी तथा मतदार नोंदणी अधिकारी प्रा. संजय खडसे यांच्या अध्यक्षतेखाली झालेल्या या बैठकीत कामाचा वेग वाढविण्याचे स्पष्ट निर्देश देण्यात आले.

बैठकीस नायब तहसीलदार डॉ. प्रवीणकुमार वराडे, संदीप बंगाळे, महसूल अधिकारी नागेश खरात, रामेश्वर कहाळे, गणेश देशमुख, संजय सोनुने, महसूल सहाय्यक तसेच महसूल विभागातील कर्मचारी व महसूल सेवक उपस्थित होते. बैठकीदरम्यान काही बीएलओंच्या ऑनलाइन डिजिटायझेशनची प्रगती दहा टक्क्यांपेक्षाही कमी असल्याचे निदर्शनास आले. याची गंभीर दखल घेत उपविभागीय अधिकारी प्रा. संजय खडसे यांनी संबंधित अधिकाऱ्यांना दैनंदिन उद्दिष्टे निश्चित करून प्रलंबित कामे तातडीने पूर्ण करण्याचे निर्देश दिले. मतदार यादी पुनरीक्षणासारख्या महत्त्वाच्या प्रक्रियेत कोणताही हलगर्जीपणा सहन केला जाणार नसल्याचे त्यांनी स्पष्ट केले. यावेळी त्यांनी इशारा देताना सांगितले की, ज्या बीएलओंची प्रगती सातत्याने असमाधानकारक राहील, त्यांच्यावर लोकप्रतिनिधित्व अधिनियम, १९५० मधील कलम १३४ तसेच भारत निवडणूक आयोगाच्या निर्देशानुसार कठोर कायदेशीर कारवाई करण्यात येईल.

मतदारांना सहकार्याचे आवाहन

मतदार यादीचे पुनरीक्षण अचूक व वेळेत पूर्ण करण्यासाठी नागरिकांचे सहकार्य अत्यंत महत्त्वाचे असल्याचे सांगत, सिंदखेडराजा विधानसभा मतदारसंघातील सर्व मतदारांनी आपल्या भागातील संबंधित मतदान केंद्रस्तरीय अधिकारी (BLO) यांच्याशी त्वरित संपर्क साधावा. मतदार यादीसाठी आवश्यक असलेली अचूक माहिती व कागदपत्रे उपलब्ध करून प्रशासनाला सहकार्य करावे, असे आवाहन उपविभागीय अधिकारी तथा मतदार नोंदणी अधिकारी प्रा. संजय खडसे यांनी केले.