बारावीच्या निकालात ‘लातूर पॅटर्न’ला खीळ; कोकणचा दबदबा कायम!

– राज्याचा निकाल ८९.७९ टक्के; कडक कॉपीमुक्त अभियानामुळे निकालात २.०९ टक्क्यांची घट!

पुणे (सोनाली बडगुजर) : महाराष्ट्र राज्य माध्यमिक व उच्च माध्यमिक शिक्षण मंडळाने शनिवारी जाहीर केलेल्या बारावीच्या निकालात राज्याचा सरासरी टक्का घसरल्याचे पाहायला मिळत आहे. यंदा राज्याचा निकाल ८९.७९ टक्के लागला असून, मागील वर्षाच्या तुलनेत त्यात २.०९ टक्क्यांची घट झाली आहे. विभागीय निकालात कोकण विभागाने आपले अव्वल स्थान परंपरेप्रमाणे राखले असले, तरी राज्याच्या शैक्षणिक क्षेत्रात एकेकाळी दबदबा निर्माण करणाऱ्या ‘लातूर पॅटर्न’ला यंदा मोठा झटका बसला आहे. लातूर विभागाचा निकाल राज्यात सर्वात कमी (८४.१४ टक्के) लागला असून तो नऊ विभागांमध्ये तळाला फेकला गेला आहे.

राज्य मंडळाचे अध्यक्ष त्रिगुण कुलकर्णी आणि शिक्षण आयुक्त सचिंद्र प्रतापसिंह यांनी शनिवारी सकाळी पुणे येथील मुख्य कार्यालयात पत्रकार परिषदेत निकालाची सांख्यिकीय माहिती दिली. यंदा १० फेब्रुवारी ते १८ मार्च २०२६ या कालावधीत परीक्षा पार पडली होती. “निकालात झालेली घट ही प्रामुख्याने राज्यभर राबवण्यात आलेल्या कडक ‘कॉपीमुक्त अभियाना’चा परिणाम आहे. परीक्षेतील पारदर्शकता राखण्यासाठी यंदा कठोर पावले उचलण्यात आली,” असे कुलकर्णी यांनी यावेळी स्पष्ट केले.

यंदा परीक्षेदरम्यान गैरप्रकारांना आळा घालण्यासाठी कडक यंत्रणा राबवण्यात आली होती. गेल्या वर्षी एकाही कर्मचाऱ्यावर कारवाई झाली नव्हती, मात्र यंदा तब्बल १०० कर्मचाऱ्यांवर प्रशासकीय कारवाई करण्यात आली असून १५ फौजदारी गुन्हे (FIR) दाखल करण्यात आले आहेत. या कडक अंमलबजावणीमुळेच निकालाचा फुगवटा कमी होऊन तो वास्तववादी स्तरावर आल्याचे बोर्डाच्या प्रशासनाकडून सांगण्यात आले.

विभागीय निकालांमध्ये दरवर्षीप्रमाणे कोकण विभागाने ९४.१४ टक्क्यांसह बाजी मारली आहे. दुसरीकडे, लातूर विभागाची कामगिरी यंदा कमालीची खालावली आहे. पुणे, मुंबई, नाशिक आणि छत्रपती संभाजीनगर या विभागांचा निकाल सरासरी असला, तरी लातूर विभागातील घट चर्चेचा विषय ठरली आहे. ‘लातूर पॅटर्न’ म्हणून ओळखल्या जाणाऱ्या या केंद्रात यंदा निकालाची घसरण झाल्याने शैक्षणिक वर्तुळात आश्चर्य व्यक्त होत आहे.

मुलींचेच वर्चस्व!

लिंगभेदाची दरी शैक्षणिक निकालात यंदाही स्पष्टपणे दिसून आली. परीक्षेत मुलींनी मुलांपेक्षा ६.३५ टक्क्यांनी सरस कामगिरी केली आहे. मुलींच्या उत्तीर्णतेचे प्रमाण ९३.१५ टक्के असून मुलांचे प्रमाण ८६.८० टक्के आहे. एकूण १४,३३,०५८ विद्यार्थ्यांनी परीक्षा दिली होती, त्यापैकी १२,८६,८४३ विद्यार्थी उत्तीर्ण झाले आहेत.

निकालाचे मोजमाप (ठळक वैशिष्ट्ये):

• राज्याचा एकूण निकाल : ८९.७९ टक्के (गेल्या वर्षी ९१.८८%)
• अव्वल विभाग : कोकण (९४.१४%)
• तळाचा विभाग : लातूर (८४.१४%)
• उत्तीर्ण मुली : ९३.१५ %
• उत्तीर्ण मुले : ८६.८० %
• शिस्तभंग : १०० कर्मचारी निलंबित, १५ एफआयआर.

दुपारी १ वाजल्यापासून विद्यार्थ्यांना खालील संकेतस्थळांवर त्यांचा वैयक्तिक निकाल पाहता येईल:

• १. mahahsscboard.in
• २. hscresult.mkcl.org
• ३. results.digilocker.gov.in

ऑनलाइन निकालानंतर आता विद्यार्थ्यांना गुणपडताळणी आणि उत्तरपत्रिकेच्या छायांकित प्रतीसाठी ५ मे पासून ऑनलाइन अर्ज करता येणार आहेत.

बारावी निकाल : अमरावती विभागात बुलढाणा ‘अव्वल’!