मातृतीर्थ सिंदखेडराजा येथील विकासकामांचा अजितदादांनी घेतला आढावा
– शिवश्री पुरूषोत्तम खेडेकरांसह जिल्ह्यातील नेत्यांची बैठकीला हजेरी
मुंबई/ सिंदखेडराजा (अनिल दराडे) – राजमाता जिजाऊंचे जन्मस्थळ असलेल्या सिंदखेडराजा येथील पर्यटकांकरिता विविध सुविधा निर्माण करणे, तसेच विकास आराखड्याचा आढावा घेण्यासाठी मंत्रालयातील उपमुख्यमंत्री अजित पवार यांच्या दालनात आज महत्वपूर्ण बैठक पार पडली. या बैठकीला मराठा सेवा संघाचे संस्थापक शिवश्री पुरूषोत्तम खेडेकर हे दूरदृश्यप्रणालीद्वारे तर जिल्ह्यातील प्रमुख लोकप्रतिनिधी व अधिकारी हे हजर होते. केंद्राच्या व राज्याच्या पुरातत्त्व विभागाने या वास्तूंच्या जतन-संवर्धनाच्या कामात समन्वय ठेवावा. लोकप्रतिनीधींना विश्वासात घेऊन कामांचे प्राधान्य ठरवून करावयाच्या तातडीच्या कामांचा सर्वसमावेशक बृहत आराखडा तयार करावा, असे निर्देश उपमुख्यमंत्री तथा वित्तमंत्री अजित पवार यांनी या बैठकीत अधिकार्‍यांना दिले.
बुलढाणा जिल्ह्यातील सिंदखेडराजा येथील जिजाऊसृष्टी मातृतीर्थ पर्यटकांकरिता विविध सुविधा निर्माण करण्यासंदर्भात बैठक पार पडली. राजमाता जिजाऊ यांचं जन्मस्थळ असलेल्या बुलढाणा जिल्ह्यातील ऐतिहासिक नगरी सिंदखेड राजा येथील वास्तूंच्या संवर्धनाची कामं तातडीनं पूर्ण होणं गरजेचं आहे.… pic.twitter.com/zw3NK8rZkj
— Ajit Pawar (@AjitPawarSpeaks) January 9, 2024
उपमुख्यमंत्री तथा वित्तमंत्री अजित पवार यांच्या अध्यक्षतेखाली जिजाऊसृष्टी मातृतीर्थ सिंदखेडराजा (जि. बुलढाणा) येथे विविध सुविधा निर्माण करण्यासंदर्भात आयोजित या बैठकीला सहकार मंत्री तथा बुलढाणा जिल्ह्याचे पालकमंत्री दिलीप वळसे पाटील, आमदार सर्वश्री डॉ. राजेंद्र शिंगणे, डॉ. संजय रायमूलकर, नियोजन विभागाचे प्रधान सचिव सौरभ विजय, वित्त विभागाच्या सचिव (वित्तीय सुधारणा) शैला ए, पर्यटन विभागाच्या सचिव जयश्री भोज, भारतीय पुरातत्त्व विभागाचे अधीक्षक पुरातत्ववीद डॉ. अरूण मलिक, पर्यटन संचालनालयाचे संचालक डॉ. बी. एन. पाटील, महाराष्ट्र पर्यटन विकास महामंडळाच्या व्यवस्थापकीय संचालक श्रद्धा जोशी-शर्मा आदी उपस्थित होते. तसेच सांस्कृतिक कार्य मंत्री सुधीर मुनगंटीवार, अमरावतीच्या विभागीय आयुक्त डॉ. निधी पांडे, बुलढाण्याचे जिल्हाधिकारी डॉ. किरण पाटील, मराठा सेवा संघाचे अध्यक्ष पुरूषोत्तम खेडेकर, राज्य पुरातत्व विभागाचे सहायक संचालक अमोल गोरे आदी दूरदृश्य प्रणालीद्वारे सहभागी झाले होते.
याप्रसंगी अजित पवार म्हणाले, की सिंदखेडराजा-जालना रस्त्यावर ऐतिहासिक काळापासून अस्तित्वात असलेल्या मोती तलावाच्या भिंतींवर झाडे, झुडपे उगवल्यामुळे त्याचे विद्रुपीकरण झाले आहे. मोठ्या झाडांची मुळे तलावासह इतर हेरिटेज वास्तूंच्या भिंतींमध्ये गेल्यामुळे ऐतिहासिक स्थळांची दुर्दशा होते. पुरातत्व विभागाने या ठिकाणी असलेली झाडे, झुडपे मुळासकट तातडीने काढून टाकावीत. त्यावर कायमस्वरूपी नियंत्रणाकरिता रासायनिक प्रक्रियेसारख्या विविध उपाययोजना कराव्यात, असे निर्देशही उपमुख्यमंत्री पवार यांनी दिले. तसेच, सिंदखेडराजा विकास आराखड्यामधील केंद्रीय व राज्य पुरातत्त्व विभागाकडील वास्तूंच्या संवर्धनाला सर्वोच्च प्राधान्य द्यावे. त्यानंतर इतर सौदर्यीकरणाची कामे हाती घ्यावीत. या आराखड्याच्या रस्त्यांच्या कामांचा समावेश नसावा. शहराच्या विकास आराखड्यातील रस्ते, बाह्यवळण रस्त्यांची कामे राज्य रस्ते विकास महामंडळ, नगरविकास विभागाच्या निधीतून करण्यात यावीत, असे आदेशही पवारांनी दिले आहेत.
———–
बुलढाणा जिल्हाधिकारी कार्यालयाने सिंदखेडराजा विकास आराखड्याचे ४५४ कोटींचे सुधारित प्रारुप मंजुरीसाठी पर्यटन व सांस्कृतिक कार्य विभागाकडे पाठविले आहे. हा विकास आराखडा उच्चस्तरीय समितीकडे आणि त्यानंतर मुख्यमंत्री यांच्या मान्यतेसाठी शिखर समितीकडे जाईल. तोपर्यंत राज्य शासनाने आणि जिल्हा विकास समितीने उपलब्ध करून दिलेल्या निधीतून पुरातत्त्व विभागाने संवर्धनाची दर्जेदार कामे करावीत. राजे लखोजीराव जाधव समाधी व रामेश्वर मंदिराजवळील जागेची आवश्यकता असल्यास त्याठिकाणी भूसंपादन करावे. आराखड्यातील सर्व कामे हेरिटेज दर्जानुसार करावीत, अशा सूचना याप्रसंगी अजित पवारांनी दिल्या आहेत.
————-