– श्री शिवशंकर विद्यालयाच्या विद्यार्थ्याची नेत्रदीपक कामगिरी; तलवारबाजीसारख्या कठीण खेळात अयान खानने गाजवले मैदान; शिक्षकांसह ग्रामस्थांकडून कौतुकाचा वर्षाव!
चिखली (अंकुश पाटील) : चिखली तालुक्यातील भरोसा येथील श्री शिवशंकर माध्यमिक व उच्च माध्यमिक विद्यालयाचा इयत्ता बारावीचा विद्यार्थी अयान खान कलीम खान याने तलवारबाजी (Fencing) स्पर्धेत तुफान कामगिरी करत विभागीय स्तरावर सुवर्णपदक (गोल्ड मेडल) पटकावले आहे. आपल्या जिद्दीच्या आणि मेहनतीच्या जोरावर त्याने मिळवलेल्या या दैदीप्यमान यशामुळे आता त्याचे राज्यस्तरीय स्पर्धेतील प्रवेशाचे मार्ग मोकळे झाले असून, या कामगिरीने भरोसा गावाच्या शिरपेचात मानाचा तुरा रोवला गेला आहे.
तलवारबाजीसारख्या अत्यंत वेगवान, ताकदीच्या आणि एकाग्रतेची कसोटी पाहणाऱ्या खेळात अयानने सुरुवातीपासूनच आपली पकड मजबूत ठेवली होती. विभागीय स्पर्धेत आपल्या खेळाचे चमकदार कौशल्य दाखवत त्याने प्रतिस्पर्ध्यांवर मात केली आणि सुवर्णपदकावर आपले नाव कोरले. त्याच्या या यशामुळे संपूर्ण परिसरात आनंदाचे वातावरण असून, सर्वच स्तरातून त्याच्यावर कौतुकाचा वर्षाव होत आहे.
अयानच्या या उज्ज्वल यशामागे त्याच्या मेहनतीसोबतच शाळा आणि शिक्षकांचे मार्गदर्शन मोलाचे ठरले आहे. त्याच्या या यशाबद्दल संस्थेच्या अध्यक्षा शिरसाठ मॅडम, विद्यालयाचे प्राचार्य संदीप वायाळ सर आणि क्रीडा शिक्षक अरुण लेंडे सर यांनी अयान खानचा विशेष सत्कार करून त्याला पुढील राज्यस्तरीय स्पर्धेसाठी हार्दिक शुभेच्छा दिल्या. तसेच विद्यालयातील सर्व शिक्षक व शिक्षकेत्तर कर्मचाऱ्यांनीही त्याच्या पाठीवर कौतुकाची थाप दिली आहे.
विभागीय स्तरावर सोन्याची कमाई केल्यानंतर आता अयान राज्यस्तरीय स्पर्धेतही अशीच सुवर्ण कामगिरी करेल आणि जिल्ह्याचा व शाळेचा नावलौकिक देशपातळीवर उंचावेल, असा ठाम विश्वास ग्रामस्थ आणि शाळा प्रशासनाकडून व्यक्त केला जात आहे.
