-१८ वर्षे पूर्ण झालेल्या विद्यार्थ्यांना नवीन मतदार नोंदणीसाठी फॉर्म क्र. ६ चे वितरण
लोणार (वाजिद खान) : कै. कु. दुर्गा क. बनमेरू विज्ञान महाविद्यालय, लोणार येथे १८ वर्षे पूर्ण झालेल्या तसेच अद्याप मतदार यादीत नाव नसलेल्या विद्यार्थ्यांसाठी विशेष मतदार नोंदणी अभियान राबविण्यात आले. युवा पिढीला लोकशाही प्रक्रियेत सहभागी करून घेणे आणि पात्र विद्यार्थ्यांची मतदार म्हणून नोंदणी करून घेणे, हा या अभियानाचा प्रमुख उद्देश होता.
महाविद्यालयाचे प्राचार्य डॉ. प्रकाश बनमेरू यांच्या मार्गदर्शनाखाली आयोजित करण्यात आलेल्या या अभियानाला विद्यार्थ्यांचा उत्स्फूर्त प्रतिसाद मिळाला. यावेळी १८ वर्षे पूर्ण झालेल्या आणि मतदार यादीत नाव नसलेल्या विद्यार्थ्यांना नवीन मतदार नोंदणीसाठी फॉर्म क्र. ६ वितरित करण्यात आले. विद्यार्थ्यांना फॉर्म भरण्याची पद्धत, आवश्यक कागदपत्रे तसेच मतदार नोंदणीची प्रक्रिया याबाबत मार्गदर्शन करण्यात आले. या कार्यक्रमाच्या मंचावर अमृत सेवाभावी संस्थेचे कोषाध्यक्ष श्री. रमेश बनमेरू उपस्थित होते. तसेच नायब तहसीलदार मा. श्री. रामप्रसाद डोळे, मंडळ अधिकारी, लोणार मा. श्री. विजय पोफळे, तसेच मा. गौंड साहेब आणि तहसील कार्यालयातील इतर कर्मचारी उपस्थित होते. मान्यवरांनी विद्यार्थ्यांशी संवाद साधत मतदार नोंदणीचे महत्त्व स्पष्ट केले. पात्र विद्यार्थ्यांनी मतदार यादीत आपले नाव नोंदवून लोकशाही प्रक्रियेत सक्रिय सहभाग घ्यावा, असे आवाहन करण्यात आले. यावेळी विद्यार्थ्यांना मतदार यादीत नाव असण्याचे महत्त्व, नवीन मतदार म्हणून नोंदणीची प्रक्रिया, फॉर्म क्र. ६ चा वापर आणि आवश्यक कागदपत्रे याबाबत सविस्तर माहिती देण्यात आली. ज्या विद्यार्थ्यांचे वय १८ वर्षे पूर्ण झाले आहे, परंतु अद्याप मतदार यादीत नाव समाविष्ट झालेले नाही, अशा विद्यार्थ्यांनी पुढाकार घेऊन आपली मतदार नोंदणी करून घ्यावी, असे सांगण्यात आले.
या अभियानाचे समन्वयक म्हणून प्रा. शिवशंकर मोरे यांनी काम पाहिले. त्यांनी विद्यार्थ्यांना मतदार नोंदणी प्रक्रियेबाबत मार्गदर्शन करून अभियानाच्या यशस्वी आयोजनासाठी समन्वय साधला. महाविद्यालयातील विद्यार्थ्यांमध्ये मतदानाचा अधिकार, लोकशाहीतील सहभाग आणि नागरिक म्हणून असलेल्या जबाबदाऱ्यांविषयी जनजागृती निर्माण करण्याच्या दृष्टीने हे अभियान महत्त्वपूर्ण ठरले. “माझे मत, माझा हक्क, माझा अभिमान” या संदेशातून पात्र विद्यार्थ्यांनी मतदार म्हणून नोंदणी करून लोकशाही प्रक्रियेत सहभागी होण्याचे आवाहन करण्यात आले. या विशेष मतदार नोंदणी अभियानामुळे महाविद्यालयातील नवमतदार विद्यार्थ्यांना प्रत्यक्ष नोंदणी प्रक्रियेची माहिती मिळाली. १८ वर्षे पूर्ण झालेल्या प्रत्येक पात्र विद्यार्थ्याने मतदार यादीत आपले नाव नोंदवावे आणि आपल्या मतदानाच्या अधिकाराचा जबाबदारीने वापर करावा, असा संदेश या अभियानातून देण्यात आला.
