-धार्मिक कार्यक्रमांसह रक्तदान व आरोग्य शिबिरांचे आयोजन; भाविकांना सहभागाचे आवाहन
लोणार (वाजिद खान) : येथील ऐतिहासिक वारसा असलेल्या आणि भाविकांचे श्रद्धास्थान असलेल्या श्री हनुमान मंदिर संस्थान (मोठा मारुती मंदिर / झोपलेला मारुती) येथे गुरुवार, २ एप्रिल २०२६ रोजी हनुमान जन्मोत्सव सोहळा अत्यंत उत्साहात आणि विविध धार्मिक व सामाजिक उपक्रमांनी साजरा होणार आहे. यावर्षी आध्यात्मिक कार्यक्रमांसोबतच भव्य रक्तदान आणि आरोग्य शिबिराचे आयोजन करण्यात आले असल्याची माहिती संस्थानच्या वतीने देण्यात आली आहे.
दिवसभराची धार्मिक रूपरेषा
जन्मोत्सवानिमित्त पहाटे ४:०० वाजता मारुतीरायाचा ‘महाअभिषेक’ संपन्न होईल. सकाळी ५:४५ वाजता ‘हनुमान जन्मकथा’ सांगण्यात येईल, त्यानंतर सकाळी ६:०० वाजता ‘जन्मोत्सव महाआरती’ व प्रसाद वाटप होईल. दुपारी १२:०० ते ३:०० या वेळेत भाविकांसाठी ‘महाप्रसाद (भंडारा)’ आयोजित करण्यात आला आहे. सायंकाळी ६:०० वाजता सामूहिक ‘हनुमान चालीसा’ पठण व महाआरती होईल, तर रात्री ८:०० वाजता ‘भजन व कीर्तन’ सोहळ्याने उत्सवाची सांगता होईल.
सेवेचा संकल्प: आरोग्य व रक्तदान शिबिर
“रक्तदान हेच श्रेष्ठदान” हा विचार डोळ्यासमोर ठेवून यावर्षी भव्य सेवा उपक्रम राबविले जाणार आहेत. यामध्ये प्रामुख्याने:
भव्य रक्तदान शिबिर: सकाळी ८:०० ते दुपारी ४:०० वाजेपर्यंत.
नेत्र व मोतीबिंदू तपासणी: सकाळी १०:०० ते दुपारी ४:०० वाजेपर्यंत.
मोफत सर्व रोग निदान व उपचार शिबिर: सकाळी १०:०० ते दुपारी २:०० वाजेपर्यंत आयोजित करण्यात आले आहे.
पुढील वर्षीचा भव्य संकल्प
हनुमान जन्मोत्सवाचा हा सोहळा दरवर्षी अधिक व्यापक होत आहे. यावर्षीच्या उत्स्फूर्त प्रतिसादातूनच पुढील वर्षी याहूनही अधिक भव्य आणि दिव्य हनुमान जन्मोत्सव साजरा करण्याचा संकल्प संस्थानने केला आहे.या सर्व धार्मिक आणि सामाजिक उपक्रमांचा लाभ घेण्याचे आवाहन श्री हनुमान मंदिर संस्थान, लोणार यांच्या वतीने करण्यात आले आहे.
