-मागील वर्षापासून समस्या कायम; ५० किलोमीटर दूर जाऊन नोंदणीची वेळ आल्याचा शेतकऱ्यांचा दावा, संतोष पाटील भुतेकर यांच्या नेतृत्वात भूमी अभिलेख कार्यालयात ठिय्या
चिखली (राजेंद्र घुबे) : भरोसा भाग-१ व काळोना हद्दीतील शेतकऱ्यांच्या खरीप हंगाम २०२६-२७ च्या पीक पेरा ऑनलाइन नोंदणीमध्ये गंभीर तांत्रिक अडचणी निर्माण झाल्याने शेतकरी संतप्त झाले आहेत. प्रत्यक्ष शेताचे लोकेशन दाखविण्याऐवजी दुसऱ्याच ठिकाणचे लोकेशन दाखविले जात असल्याने अनेक शेतकऱ्यांना आपल्या पिकांची ऑनलाइन नोंद करता येत नसल्याची समस्या निर्माण झाली आहे.
विशेष म्हणजे ही समस्या यावर्षीची नसून मागील खरीप हंगामापासून कायम असल्याचे शेतकऱ्यांचे म्हणणे आहे. सन २०२५-२६ मध्येही भरोसा भाग-१ मधील शेतकऱ्यांना पीक पेरा ऑनलाइन करण्यासाठी तब्बल ५० किलोमीटर अंतरावर भोरसा-बोरसे येथे जावे लागले होते. प्रशासनाच्या निदर्शनास ही समस्या आणून दिल्यानंतरही वर्षभरात तिचे कायमस्वरूपी निराकरण झाले नसल्याने यंदाही शेतकऱ्यांसमोर तोच प्रश्न उभा राहिला आहे.
काळोना हद्दीतील एकाही शेतकऱ्याचा पीक पेरा ऑनलाइन होत नसल्याचा दावा
काळोना हद्दीतील परिस्थिती आणखी गंभीर असून, या हद्दीतील एकाही शेतकऱ्याचा पीक पेरा ऑनलाइन होत नसल्याचा दावा शेतकऱ्यांनी केला आहे. त्यामुळे प्रत्यक्ष शेतात पिके उभी असतानाही शासनाच्या ऑनलाइन अभिलेखात त्यांची नोंद होण्यास अडथळा निर्माण झाला आहे. पीक पेरा ऑनलाइन न झाल्यास भविष्यात पीक विमा, दुष्काळी मदत, नैसर्गिक आपत्तीतील नुकसानभरपाई तसेच शासनाच्या विविध योजनांच्या लाभांवर परिणाम होण्याची भीती शेतकऱ्यांनी व्यक्त केली आहे. ही समस्या वेळीच सुटली नाही तर दुष्काळी मदत, पीक विमा आणि इतर शासकीय योजनांच्या लाभांपासून वंचित राहावे लागू शकते, अशी चिंता शेतकऱ्यांनी व्यक्त केली.
वारंवार पाठपुरावा करूनही तोडगा नाही
या गंभीर तांत्रिक समस्येबाबत संबंधित अधिकारी, तहसीलदार तसेच भूमी अभिलेख विभागातील अधिकाऱ्यांकडे वारंवार पाठपुरावा करण्यात आला. मात्र, अद्यापही शेतकऱ्यांना समाधानकारक व कायमस्वरूपी तोडगा मिळालेला नसल्याने अखेर आंदोलनाचा मार्ग स्वीकारावा लागल्याचे शेतकऱ्यांनी सांगितले.
संतोष पाटील भुतेकर यांच्या नेतृत्वात ठिय्या आंदोलन
प्रशासनाचे लक्ष वेधण्यासाठी दि. २८ सप्टेंबर २०२६ रोजी दुपारी ३ वाजल्यापासून भूमी अभिलेख कार्यालयात युवासेना उपजिल्हाप्रमुख संतोष पाटील भुतेकर यांच्या नेतृत्वाखाली लोकशाही व शांततामय मार्गाने ठिय्या आंदोलन सुरू करण्यात आले आहे. या आंदोलनात गणेशभाऊ ऊसर, समाधान ऊसर, सुधाभाऊ शिंदे, कृष्णा भुतेकर यांच्यासह भरोसा भाग-१ व काळोना हद्दीतील इतर शेतकरी सहभागी झाले आहेत. शेतकऱ्यांची प्रमुख मागणी म्हणजे भरोसा भाग-१ व काळोना हद्दीतील तांत्रिक समस्या तातडीने दूर करून प्रत्यक्ष शेताच्या अचूक लोकेशनवर पीक पेरा ऑनलाइन नोंदविण्याची सुविधा उपलब्ध करून देणे. तसेच भविष्यात अशा प्रकारची समस्या पुन्हा निर्माण होणार नाही, यासाठी कायमस्वरूपी तांत्रिक उपाययोजना करण्याची मागणीही करण्यात आली आहे.
“समस्या सुटेपर्यंत आंदोलन सुरूच राहणार”
“मागील वर्षी ५० किलोमीटर दूर जाऊन पीक पेरा नोंदविण्याची वेळ शेतकऱ्यांवर आली. एक वर्ष उलटूनही समस्या कायम असेल तर शेतकऱ्यांनी पुन्हा त्याच त्रासाला का सामोरे जावे? प्रशासनाने तातडीने तांत्रिक अडचण दूर करून शेतकऱ्यांचा पीक पेरा ऑनलाइन करून द्यावा. जोपर्यंत ही समस्या कायमस्वरूपी सुटत नाही, तोपर्यंत आंदोलन सुरूच राहणार,” अशी ठाम भूमिका युवासेना उपजिल्हाप्रमुख संतोष पाटील भुतेकर यांनी व्यक्त केली. दरम्यान, प्रशासनाने शेतकऱ्यांच्या या गंभीर प्रश्नाची तातडीने दखल घेऊन संबंधित तांत्रिक अडचण दूर करावी आणि भरोसा भाग-१ व काळोना हद्दीतील सर्व संबंधित शेतकऱ्यांचा पीक पेरा वेळेत ऑनलाइन करून द्यावा, अशी मागणी आंदोलनकर्त्यांनी केली आहे.
