– Gen Z चा नवा आदर्श! १९ वर्षीय देवव्रतने काशीत रचला इतिहास; वैदिक विद्येची पताका जगभर उंचवली!
अहिल्यानगर/वाराणसी (केयूर सांगळे): महाराष्ट्रातील अहिल्यानगर (पूर्वीचे अहमदनगर) येथील अवघ्या १९ वर्षांच्या देवव्रत महेश रेखे या तरुणाने वेदाध्ययनाच्या क्षेत्रात एक ऐतिहासिक कामगिरी करत संपूर्ण देशाचे लक्ष वेधून घेतले आहे. गेल्या २०० वर्षांत देशातील शंकराचार्य किंवा मठाधीश यांनाही जी गोष्ट साधता आली नाही, ते अत्यंत कठीण असलेले ‘दंडक्रम पारायण’ देवव्रतने केवळ ५० दिवसांत बिनचूकपणे पूर्ण केले आहे. त्याच्या या अलौकिक सिद्धीमुळे पंतप्रधान नरेंद्र मोदी यांच्यासह धार्मिक आणि अध्यात्मिक क्षेत्रातील मान्यवरांकडून त्याचे विशेष कौतुक होत आहे.
दीड वर्षात मिळवली सिद्धी!
सामान्यतः दंडक्रम पारायणाचे शिक्षण घेण्यासाठी पाच वर्षांचा कालावधी लागतो, पण गुरुकृपेमुळे देवव्रतने दीड वर्षांतच हे शिक्षण पूर्ण केले. याविषयी बोलताना तो म्हणाला, “मी १७ वर्षांचा असल्यापासून दंडक्रम पारायण शिकण्यास सुरुवात केली. दिवसातील १२ ते १८ तास शिक्षण सुरू होते, तेव्हाच हे साध्य झाले. मी आताच्या पिढीला एवढेच सांगेन की, आपले मूळ हे वेदधर्म आहे, हे विसरू नका. अभ्यास करत राहा आणि गुरुसेवा करत राहा.” देवव्रतच्या या वेदपरीक्षेसाठी गणेश्वर शास्त्रींसह काशीचे नामवंत विद्वान आणि देशाच्या कानाकोपऱ्यातून आलेले वेदशास्त्री उपस्थित होते. अहिल्यानगरच्या या तरुणाने काशीतील २०० वर्षांचा इतिहास बदलून टाकल्याबद्दल सर्वत्र त्याचे अभिनंदन होत आहे.
