-चिखली-खामगाव मार्गावरील अपघातात बसचालक गंभीर जखमी; काही प्रवाशांनाही दुखापत
चिखली (अंकुश पाटील) : चिखली-खामगाव मार्गावर चिखलीपासून सात किलोमीटर अंतरावर असलेल्या बोरगाव वसू फाट्याजवळ शुक्रवार, दि. २८ ऑगस्ट २०२६ रोजी दुपारी चार वाजण्याच्या सुमारास बस आणि टिप्परची समोरासमोर जोरदार धडक झाली. या भीषण अपघातात टिप्पर चालकाचा घटनास्थळीच मृत्यू झाला असून, बसचालकाचे दोन्ही पाय गंभीर जखमी झाल्याची माहिती आहे. बसमधील काही प्रवाशांनाही दुखापत झाली असून, त्यांना उपचारासाठी विविध रुग्णालयांत दाखल करण्यात आले आहे.
मिळालेल्या प्राथमिक माहितीनुसार, छत्रपती संभाजीनगरहून अकोल्याकडे जाणाऱ्या बसची बोरगाव वसू फाट्याजवळ समोरून येणाऱ्या भरधाव टिप्पर क्रमांक एमएच २८ एबी ८२२८ सोबत जोरदार धडक झाली. धडक इतकी भीषण होती की टिप्परच्या पुढील भागाचा अक्षरशः चुराडा झाला. टिप्परची केबिन मोठ्या प्रमाणात दबल्याने चालक सचिन वाघ, रा. संभाजीनगर, चिखली, यांचा जागीच मृत्यू झाला. बसचालकही या अपघातात गंभीर जखमी झाला असून, त्याचे दोन्ही पाय गंभीररीत्या जखमी झाले आहेत. इतर जखमी प्रवाशांना उपचारासाठी विविध रुग्णालयांत दाखल करण्यात आले आहे. सदर टिप्पर हा बाळू जाधव, रा. हातणी यांच्या मालकीचा असल्याचे समजते.
नागरिकांनी घटनास्थळी धाव घेतली
अपघाताची माहिती मिळताच परिसरातील नागरिकांनी घटनास्थळी धाव घेतली. अपघातग्रस्त वाहनांमुळे काही काळ परिसरात गर्दी निर्माण झाली होती. घटनेची माहिती मिळताच पोलिस तसेच आपत्कालीन यंत्रणांनी घटनास्थळी धाव घेतली. अपघातग्रस्त वाहनांमध्ये अडकलेल्या व्यक्तींना बाहेर काढण्यासाठी मदतकार्य करण्यात आले. जखमींना पुढील उपचारासाठी चिखली येथील रुग्णालयात हलविण्यात आले असून, त्यांच्यावर उपचार सुरू आहेत. पोलिसांकडून अधिकृत माहिती प्राप्त झाल्यानंतर अपघाताचे नेमके कारण स्पष्ट होणार आहे.
