जनगणना २०२७ अंतर्गत ‘घर गणना’ मोहिमेला चिखली तालुक्यात सुरुवात

प्रगणकांना अचूक माहिती देऊन सहकार्य करावे : तहसीलदार विजय सवडे यांचे नागरिकांना आवाहन

देऊळगाव घुबे (राजेंद्र घुबे) : केंद्र शासनाच्या मार्गदर्शक सूचनांनुसार देशपातळीवर राबविण्यात येणाऱ्या ‘जनगणना २०२७’ अंतर्गत पहिल्या टप्प्यातील ‘घर गणना’ (Houselisting) आणि घरांची यादी तयार करण्याच्या महत्त्वपूर्ण मोहिमेला आजपासून चिखली तालुक्यात अधिकृतपणे सुरुवात झाली आहे. सदर गणना मोहीम दिनांक १६ मे ते १४ जून २०२६ या महिनाभराच्या कालावधीत संपूर्ण तालुक्यात एकाच वेळी राबविण्यात येणार असल्याची माहिती चिखलीचे तहसीलदार तथा चार्ज अधिकारी (ग्रामीण) विजय सवडे यांनी प्रसिद्धी पत्रकाद्वारे दिली आहे.

चिखली तालुक्याचे सांख्यिकीय नियोजन

या मोहिमेच्या यशस्वी अंमलबजावणीसाठी प्रशासनाने पूर्वतयारी पूर्ण केली असून संपूर्ण तालुक्याचे विभाजन करण्यात आले आहे. तालुक्यात एकूण ३८६ हाऊस लिस्टिंग ब्लॉक (HLB) निश्चित करण्यात आले असून ३६४ प्रगणक आणि ६१ पर्यवेक्षकांची नियुक्ती करण्यात आली आहे. नियुक्त प्रगणक आणि पर्यवेक्षक, ज्यामध्ये प्रामुख्याने शिक्षक व शासकीय कर्मचाऱ्यांचा समावेश आहे, ते तालुक्यातील प्रत्येक घराला प्रत्यक्ष भेट देऊन माहिती संकलित करणार आहेत.

डिजिटल पद्धतीने होणार जनगणना

यंदाच्या जनगणनेत पारंपरिक कागदी पद्धतीऐवजी अत्याधुनिक मोबाईल ॲप आणि डिजिटल माध्यमांचा वापर करण्यात येणार आहे. त्यामुळे माहिती अधिक सुरक्षित आणि अचूक राहण्यास मदत होणार आहे.

यासोबतच नागरिकांना ‘स्व-गणना’ (Self-Enumeration) करण्याची सुविधाही उपलब्ध करून देण्यात आली आहे. ज्या नागरिकांनी ऑनलाइन पद्धतीने स्वतःची माहिती भरून ‘स्व-गणना’ पूर्ण केली आहे, त्यांनी प्रगणक घरी आल्यानंतर आपला SE ID (Self-Enumeration ID) देणे आवश्यक आहे. त्यामुळे पुन्हा माहिती भरण्याची गरज भासणार नाही.

नागरिकांची जबाबदारी आणि कायदेशीर तरतुदी

जनगणना ही देशाच्या लोककल्याणकारी योजनांचा पाया मानली जाते. जनगणना कायदा १९४८ नुसार प्रत्येक नागरिकाने प्रगणकांना खरी, अचूक आणि संपूर्ण माहिती देणे बंधनकारक आहे. नागरिकांनी दिलेली माहिती पूर्णपणे गोपनीय ठेवली जाते आणि तिचा वापर कोणत्याही कर आकारणी किंवा चौकशीसाठी केला जात नाही. प्रशासनाने स्पष्ट केले आहे की, जाणीवपूर्वक चुकीची माहिती देणे किंवा माहिती देण्यास नकार देणे हा कायदेशीर गुन्हा मानला जाऊ शकतो आणि संबंधितांवर दंडात्मक कारवाई होऊ शकते.

तहसीलदार विजय सवडे यांचे आवाहन

चार्ज अधिकारी (ग्रामीण) तथा तहसीलदार विजय सवडे यांनी नागरिकांना आवाहन करताना सांगितले की, “प्रगणकांना आपले राष्ट्रीय कर्तव्य समजून पूर्ण सहकार्य करावे. घराची आणि कुटुंबाची खरी व अचूक माहिती द्यावी. तसेच ज्यांनी ‘स्व-गणना’ केली आहे त्यांनी आपला SE ID प्रगणकाकडे नोंदवावा. कोणत्याही अफवांवर विश्वास न ठेवता नागरिकांनी या राष्ट्रीय मोहिमेत सक्रिय सहभाग घ्यावा.”