आळंदी ( अर्जुन मेदनकर ) : येथील मेदनकरवाडी ( ता.खेड ) येथील ग्रामदैवत श्री खंडोबा महाराज मंदिरात चंपाषष्ठी निमित्ताने प्रथापरंपरांचे पालन करीत विविध धार्मिक कार्यक्रम उत्साहात झाले. श्रींचे दर्शनास तसेच तळी भंडार, नैवेद्य अर्पण करण्यासह श्रीफळ वाढविण्यास भाविकांची मोठी गर्दी झाली होती. भाविकांनी श्रींचे दर्शनास रांगा लावून दर्शन बारीतून देवदर्शन घेत तळी भंडार केला.
मेदनकरवाडी येथील श्री खंडोबा मंदिर हे अनेक वर्षांपासून प्रसिद्ध आहे. मेदनकरवाडी गावातील भाविक अरुण तोडकर अनेक वर्षांपासून श्रींची सेवा करीत असून यावर्षीही सेवा त्यांनी रुजू केली. श्री खंडोबा मंदिर हे देवस्थान जागरूक देवस्थान असून भाविकांच्या मनोकामना पूर्ण होतात अशी श्रद्धा भाविकांची आहे. यामुळे पंचक्रोशीतून भाविक नित्य नेमाने दर्शनास , धार्मिक उपक्रमांस गर्दी करीत असतात.
