चिखली (एकनाथ माळेकर) – गावात धुमाकूळ घालून ग्रामस्थांना जेरीस आणणार्या माकडांचा अखेर अंत्री खेडेकर ग्रामस्थांनी लोकवर्गणी गोळा करून वन्यप्राणी मित्राच्या सहाय्याने बंदोबस्त केला. माकडांचा बदोबस्त करण्याची मागणी वनविभागाकडे केली होती. परंतु, या विभागाचे अधिकारी झोपेचे सोंग घेऊन असल्याने अखेर ग्रामस्थांना आपली सुरक्षा आपणच करावी लागली. पकडलेली ही माकडे बोथा अभयारण्यात सोडण्यात आली आहे. माकडे पकडली गेल्याने ग्रामस्थांनी सुटकेचा निःश्वास सोडला आहे.
या माकडांनी गावात धुमाकूळ घालून लोकांना जगणे मुश्कील केले होते. विशेष करून लहान मुलांवर ही माकडे हल्ले करत होते. तसेच गावातील घरांवर उड्या मारून पत्रे मोडणे, मालाची नासधुस करणे, दुचाकी-चारचाकी गाड्यांवर उड्या मारणे व त्यांचे नुकसान करणे, असा या माकडांचा गावात उपद्रव सुरु होता. या त्रासाला कंटाळून गावातील सुज्ञ नागरिकांनी सुरुवातीला वनविभागाकडे तक्रार केली. परंतु, त्यांनी दखल घेतली नाही. त्यामुळे ग्रामस्थांनी वन्यप्राणी मित्राला बोलावून गावातील माकडे पकडले व ती वनात सोडून दिली आहे.
