-धर्मादाय आयुक्तांची मढी येथील देवस्थानास भेट; मंदिर परिसराची पाहणी, भाविकांसाठी सुविधा वाढविण्याबाबत विश्वस्तांशी चर्चा
पाथर्डी (बाळासाहेब खेडकर) : श्री क्षेत्र मढी येथील धार्मिक व ऐतिहासिक महत्त्व असलेल्या श्री कान्होबा उर्फ कानिफनाथ देवस्थानास अहिल्यानगरचे धर्मादाय उपायुक्त नवनाथ जगताप यांनी रविवारी भेट देऊन मनोभावे दर्शन घेतले. यावेळी त्यांनी मंदिर परिसराची पाहणी करून देवस्थानच्या विकासकामांची माहिती घेतली. भाविकांच्या सेवेसाठी अधिकाधिक सुविधा उपलब्ध करून देण्यासाठी विविध उपयोजना राबविण्याबाबत देवस्थानचे विश्वस्त व पदाधिकाऱ्यांशी सविस्तर चर्चा करण्यात आली.
पाथर्डी तालुका ही साधुसंतांची भूमी असून, या भूमीला मोठी धार्मिक, आध्यात्मिक व सांस्कृतिक परंपरा लाभली आहे. मढी, मोहटादेवी आणि कान्होबा-कानिफनाथ यांसारख्या देवस्थानांमुळे या परिसराला वेगळे महत्त्व प्राप्त झाले आहे. या देवस्थानांचा सर्वांगीण विकास करून धार्मिक पर्यटनाला चालना देण्यासाठी आवश्यक त्या उपाययोजना हाती घेण्याच्या दृष्टीने प्रयत्न करण्यात येतील, असे धर्मादाय उपायुक्त नवनाथ जगताप यांनी यावेळी नमूद केले. धार्मिक पर्यटनाच्या माध्यमातून पाथर्डी तालुक्याच्या विकासाला मोठी चालना मिळू शकते. बाहेरील जिल्ह्यांतून तसेच राज्याच्या विविध भागांतून येणाऱ्या भाविकांना या परिसरातील धार्मिक स्थळांची माहिती मिळावी, त्यांना आवश्यक सुविधा उपलब्ध व्हाव्यात आणि स्थानिक पातळीवर रोजगाराच्या संधी निर्माण व्हाव्यात, यासाठी देवस्थानांच्या विकासाकडे व्यापक दृष्टिकोनातून पाहण्याची आवश्यकता असल्याचेही यावेळी चर्चेतून समोर आले.
धर्मादाय उपायुक्तांच्या भेटीमुळे देवस्थानच्या विकासाला प्रशासकीय पातळीवर अधिक गती मिळण्याची अपेक्षा व्यक्त होत आहे. मंदिर परिसराच्या विकासासाठी उपलब्ध साधनसामग्रीचा योग्य वापर करून भाविकांच्या हिताच्या विविध योजना राबविण्याबाबतही यावेळी सकारात्मक चर्चा झाली. यावेळी श्री कान्होबा देवस्थानचे अध्यक्ष विठ्ठलराव मरकड, देवस्थानचे विश्वस्त मदनराव मरकड, श्री जगदंबा देवी सार्वजनिक ट्रस्ट, मोहटादेवीचे विश्वस्त ॲड. विक्रम वाडेकर, राजकुमार पाटील, कुंजीर भाऊ, ॲड. मानसिंग पवार, व्यवस्थापक संजय मरकड, कर्मचारी तसेच अन्य मान्यवर उपस्थित होते. देवस्थानच्या वतीने धर्मादाय उपायुक्त नवनाथ जगताप यांचे स्वागत करण्यात आले. भेटीदरम्यान मंदिर परिसरातील विविध बाबींची माहिती विश्वस्तांनी त्यांना दिली.
धार्मिक पर्यटनातून स्थानिकांना रोजगाराच्या संधी
पाथर्डी तालुक्यातील विविध धार्मिक स्थळांना जोडून धार्मिक पर्यटनाचा विकास करण्याची मोठी क्षमता आहे. कानिफनाथ देवस्थानासह मढी व मोहटादेवी परिसरातील धार्मिक स्थळांचा नियोजनबद्ध विकास झाल्यास भाविकांची संख्या वाढण्याबरोबरच स्थानिक व्यावसायिक, छोटे दुकानदार, हॉटेल व्यावसायिक तसेच अन्य घटकांना आर्थिक फायदा होऊ शकतो. त्यामुळे देवस्थान विकासाच्या माध्यमातून परिसराच्या सर्वांगीण विकासाचा मार्ग मोकळा होण्याची अपेक्षा व्यक्त होत आहे.
