-परभणीतील राज्यस्तरीय स्पर्धेत बुलढाणा जिल्ह्याचा गौरव; अक्षरा पांडव व आरोही क्षीरसागर यांना कांस्यपदक
चिखली (राजेंद्र घुबे) : २१ ऑगस्ट २०२६ रोजी परभणी येथे झालेल्या राज्यस्तरीय तलवारबाजी स्पर्धेत कु. शर्वरी मीना प्रवीण मिसाळ हिने बुलढाणा जिल्ह्याचे प्रतिनिधित्व करत फेन्सिंग (इप्पी) या प्रकारात उत्कृष्ट कामगिरी करीत रौप्यपदक पटकावले. या उल्लेखनीय कामगिरीच्या जोरावर तिची जम्मू-काश्मीर येथे आयोजित करण्यात येणाऱ्या राष्ट्रीय तलवारबाजी स्पर्धेसाठी निवड झाली आहे. तसेच कु. अक्षरा पांडव आणि कु. आरोही क्षीरसागर यांनीही स्पर्धेत चमकदार कामगिरी करत कांस्यपदक पटकावले.
जिल्ह्यातील विद्यार्थ्यांना तलवारबाजी स्पर्धेसाठी दर्जेदार प्रशिक्षण मिळावे, यासाठी संबंधित पदाधिकाऱ्यांनी स्वतः मेहनत घेत कमी खर्चात जिल्हा तलवारबाजी केंद्र उभारले आहे. या केंद्रातून मेहनतीने खेळाडू तयार केले जात असून, त्याचा फायदा जिल्ह्यातील खेळाडूंना होत आहे. खेळाडूंना सातत्याने मार्गदर्शन आणि पाठिंबा देणाऱ्या सर्व प्रशिक्षक, पदाधिकारी आणि पालकांचे योगदानही या यशामध्ये महत्त्वाचे ठरले आहे. शर्वरी मिसाळ हिची राष्ट्रीय तलवारबाजी स्पर्धेसाठी झालेली निवड ही बुलढाणा जिल्ह्यासाठी अभिमानाची बाब असून, तिच्या या यशाबद्दल सर्व पालक, खेळाडू, बुलढाणा जिल्हा तलवारबाजी असोसिएशन तसेच शिवश्री प्रवीण मिसाळ सर (जिल्हा समन्वयक, संभाजी ब्रिगेड तथा संपादकीय संचालक, ब्रेकिंग महाराष्ट्र न्यूज मीडिया) यांच्या वतीने शर्वरीसह अक्षरा पांडव आणि आरोही क्षीरसागर यांचे अभिनंदन करण्यात आले. राष्ट्रीय स्पर्धेसाठी निवड झालेल्या कु. शर्वरी मिसाळ हिला पुढील वाटचालीसाठी शुभेच्छा व सदिच्छा व्यक्त करण्यात आल्या.
