जिल्हा रुग्णालयाच्या स्वच्छतेसाठी मनपाचे सहकार्य; उपमहापौर राजेश राऊत यांची सदिच्छा भेट

-रुग्णहिताच्या उपक्रमांना महापालिकेचा हातभार; दररोज घंटागाडी, घनकचरा प्रकल्पासाठी CSRमधून मदतीचे आश्वासन

जालना (सुरेश हुसे) : जिल्हा रुग्णालयातील रुग्णसेवा, स्वच्छता व्यवस्था आणि रुग्णांच्या नातेवाईकांसाठी उपलब्ध सुविधांचा आढावा घेण्यासाठी जालना महानगरपालिकेचे उपमहापौर राजेश राऊत यांनी मंगळवारी (दि. २८ जुलै) जिल्हा रुग्णालयाला सदिच्छा भेट दिली. रुग्णालयातील विविध विभागांची पाहणी करून त्यांनी कामकाजाबाबत समाधान व्यक्त केले. तसेच स्वच्छता व्यवस्था अधिक सक्षम करण्यासह रुग्णहिताच्या विविध उपक्रमांसाठी महानगरपालिकेच्या वतीने आवश्यक ते सर्व सहकार्य करण्याचे आश्वासन दिले.

या भेटीदरम्यान अतिरिक्त जिल्हा शल्यचिकित्सक डॉ. राजेंद्र गाडेकर यांच्यासह श्री. खंडेलवाल, मंगेश देशमुख, डॉ. जायभाये, डॉ. जक्कल, डॉ. पाटोडेकर, डॉ. स्वप्नाली आदी उपस्थित होते. जिल्हा रुग्णालय परिसरातील स्वच्छता अधिक प्रभावीपणे राखण्यासाठी महानगरपालिकेच्या वतीने दररोज घंटागाडी उपलब्ध करून देण्यात येणार असल्याची माहिती उपमहापौर राजेश राऊत यांनी दिली. रुग्णालयात दररोज मोठ्या संख्येने रुग्ण व त्यांच्या नातेवाईकांची वर्दळ असते. त्यामुळे स्वच्छता आणि कचरा व्यवस्थापन अधिक सक्षम करण्यासाठी महापालिका व रुग्णालय प्रशासनाच्या समन्वयातून विशेष उपाययोजना राबविण्यात येणार असल्याचे त्यांनी सांगितले. रुग्णालयातील घनकचरा व्यवस्थापन अधिक शास्त्रशुद्ध व प्रभावी करण्यासाठी आवश्यक असलेल्या घनकचरा प्रकल्पासाठी कॉर्पोरेट सोशल रिस्पॉन्सिबिलिटी (CSR) निधीतून मदत मिळवून देण्यासाठी प्रयत्न करण्यात येतील, असे आश्वासनही त्यांनी दिले. रुग्णालयातील स्वच्छता ही केवळ परिसराच्या सौंदर्याशी संबंधित नसून रुग्ण व त्यांच्या नातेवाईकांच्या आरोग्याशी निगडित अत्यंत महत्त्वाचा विषय असल्याचे त्यांनी यावेळी अधोरेखित केले.

यावेळी रुग्णांसोबत येणाऱ्या नातेवाईकांसाठी उपलब्ध धर्मशाळेची सुरक्षा, स्वच्छता तसेच स्वच्छतागृहांच्या सुविधांबाबतही सविस्तर चर्चा करण्यात आली. उपचारासाठी दूरवरून येणाऱ्या रुग्णांच्या नातेवाईकांना सुरक्षित, स्वच्छ आणि सुसज्ज सुविधा उपलब्ध व्हाव्यात, यासाठी आवश्यक उपाययोजना करण्यावर भर देण्यात आला. महानगरपालिकेकडून स्वच्छता व्यवस्था, घनकचरा व्यवस्थापन आणि रुग्णांच्या नातेवाईकांसाठीच्या मूलभूत सुविधांमध्ये सुधारणा करण्यासाठी मिळणाऱ्या सहकार्यामुळे जिल्हा रुग्णालय प्रशासनाच्या प्रयत्नांना अधिक बळ मिळणार असल्याची भावना यावेळी व्यक्त करण्यात आली. रुग्णहिताला केंद्रस्थानी ठेवून महानगरपालिका आणि जिल्हा रुग्णालय प्रशासन यांच्यातील समन्वय अधिक दृढ करण्याच्या दृष्टीने उपमहापौर राजेश राऊत यांची ही सदिच्छा भेट महत्त्वपूर्ण ठरली.