-बीएलओंच्या कामाची वरिष्ठ अधिकाऱ्यांकडून प्रत्यक्ष पाहणी; गुणवत्तापूर्ण व वेळेत काम पूर्ण करण्याच्या सूचना
सिंदखेडराजा (सुरेश हुसे) : २४-सिंदखेडराजा विधानसभा मतदारसंघात विशेष संक्षिप्त पुनरिक्षण (SIR) कार्यक्रमांतर्गत मतदार यादीच्या डिजिटायझेशनचे काम वेगाने सुरू असून, या प्रक्रियेला अधिक गती व अचूकता मिळावी यासाठी उपविभागीय अधिकारी तथा मतदार नोंदणी अधिकारी प्रा. संजय खडसे आणि तहसीलदार अजित दिवटे यांनी सिंदखेडराजा तहसील कार्यालयात मतदान केंद्रस्तरीय अधिकारी (BLO) यांच्या कामाची प्रत्यक्ष पाहणी केली.
तहसीलदार अजित दिवटे यांनीही बीएलओंच्या कामाचा आढावा घेत डिजिटायझेशन प्रक्रियेदरम्यान उद्भवणाऱ्या तांत्रिक अडचणी जाणून घेतल्या. संबंधित अडचणींचे तातडीने निराकरण करून शासनाने निश्चित केलेल्या कालमर्यादेत काम पूर्ण करण्यासाठी सर्वांनी समन्वयाने कार्य करण्याचे आवाहन त्यांनी केले. या प्रसंगी नायब तहसीलदार डॉ. प्रवीणकुमार वराडे, निवडणूक नायब तहसीलदार संदीप बंगाळे, नागेश खरात, गणेश देशमुख, निवडणूक शाखेचे कर्मचारी तसेच मतदारसंघातील मोठ्या संख्येने मतदान केंद्रस्तरीय अधिकारी (BLO) उपस्थित होते. वरिष्ठ अधिकाऱ्यांच्या प्रत्यक्ष पाहणी आणि मार्गदर्शनामुळे मतदार यादीच्या डिजिटायझेशन प्रक्रियेला अधिक गती मिळत असून, २४-सिंदखेडराजा विधानसभा मतदारसंघात अचूक, अद्ययावत आणि पारदर्शक मतदार यादी तयार करण्यासाठी प्रशासनाकडून प्रभावी प्रयत्न सुरू असल्याचे चित्र दिसून येत आहे.
