अंतरी-खेडेकर-रोडा रस्त्याचे काम प्रगतीपथावर

-शेतकऱ्यांचे निवेदन; नायब तहसीलदारांकडून अडचणी तातडीने दूर करण्याचे निर्देश

चिखली (अंकुश पाटील) : तालुक्यातील अंतरी-खेडेकर-रोडा रस्त्याचे काम प्रगतीपथावर असून ते तातडीने पूर्ण करण्यात यावे, या मागणीसाठी अंतरी खेडेकर व रोडा येथील शेतकऱ्यांनी बुधवारी दुपारी नायब तहसीलदार मुरलीधर गायकवाड यांना निवेदन सादर केले.

निवेदनात नमूद करण्यात आले आहे की, नारायण विठोबा खेडेकर यांच्या शेतापासून नालीचे खोदकाम करण्यात यावे तसेच रस्त्यावर आवश्यक भराव टाकण्यात यावा. पावसाचे पाणी वाहून जाण्यासाठी सिमेंट पाईप बसविण्यात यावेत. तसेच रस्त्यावर मुरूम टाकून रोलर फिरविण्यात यावा, अशी मागणी करण्यात आली आहे. रस्त्याचे काम सुरू असताना काही शेतकऱ्यांनी संबंधित अधिकाऱ्यांच्या उपस्थितीनंतरच काम पूर्ण होईल, असे सांगितल्याने याबाबत योग्य ती कार्यवाही करण्याची मागणीही निवेदनात करण्यात आली आहे.

या मागणीची तात्काळ दखल घेत नायब तहसीलदार मुरलीधर गायकवाड यांनी संबंधित तलाठ्यांना कामातील अडचणी दूर करून रस्त्याचे मातीकाम लवकरात लवकर पूर्ण करण्याचे निर्देश दिले. यावेळी संजय खेडेकर, पंजाब खेडेकर, शिवाजीराव खेडेकर, नारायण खेडेकर, उत्तम माळेकर, दगडू खेडेकर, एकनाथ खेडेकर, राहुल टाकळकर, दीपक काळंगे, सागर खरात, अनिल बबलू, विजय मोरे, आत्माराम पडघान, समाधान मोरे आदी उपस्थित होते.