स्मार्ट मीटरवरून ग्राहकांमध्ये संताप; अव्वाच्या सव्वा वीजबिलाचा आरोप

-स्मार्ट मीटरला गावकऱ्यांचा ठाम विरोध; जादा बिले कमी करण्याचे महावितरणचे आश्वासन

मेहकर (तालुका प्रतिनिधी) : स्मार्ट मीटर बसवल्यानंतर अव्वाच्या सव्वा वीजबिले येत असल्याचा आरोप करत देऊळगाव साखरशा येथील वीज ग्राहकांनी तीव्र संताप व्यक्त केला. जादा आलेली वीजबिले कमी करून मीटर बदलून द्यावेत, अशी मागणी ग्राहकांनी १५ जून रोजी ग्रामपंचायत कार्यालयात आयोजित बैठकीत केली.

यावेळी प्रशासक तथा शिवसेना (शिंदे गट) युवा सेनेचे तालुकाप्रमुख संदीप अल्हाट आणि सागर समुद्रवार यांनी गावात यापुढे स्मार्ट मीटर बसवू नयेत, अन्यथा तीव्र आंदोलन छेडण्यात येईल, असा इशारा दिला. तसेच जादा वीजबिलांची होळी करण्यात येईल, असेही त्यांनी स्पष्ट केले. स्मार्ट मीटरच्या नावाने सध्या सर्वत्र चर्चा सुरू असून, या मीटरमुळे हजारो रुपयांची वीजबिले येत असल्याची तक्रार ग्राहकांकडून केली जात आहे. काही ग्राहकांनी दोन दिवे आणि एक पंखा वापरूनही हजारो रुपयांची बिले आल्याचे दाखवत आपली नाराजी व्यक्त केली. त्यामुळे संबंधित मीटर बदलून देण्यात यावेत आणि वाढीव वीजबिले कमी करण्यात यावीत, अशी मागणी करण्यात आली. बैठकीला उपस्थित असलेले महावितरणचे कनिष्ठ अभियंता अमोल बेंडेवार यांनी ग्राहकांच्या तक्रारी ऐकून घेतल्या. त्यांनी जादा आलेल्या वीजबिलांची माहिती संकलित करून ती नियमानुसार तपासण्यात येईल आणि आवश्यक त्या ठिकाणी दुरुस्ती करण्यात येईल, अशी ग्वाही दिली. तसेच संबंधित ग्राहकांची वीजबिले तातडीने कमी करण्यासाठी कार्यवाही करण्यात येईल, असेही त्यांनी सांगितले.

या आश्वासनानंतर ग्राहकांचा रोष काहीसा कमी झाल्याचे दिसून आले. मात्र, भविष्यात देऊळगाव साखरशा येथे स्मार्ट मीटर बसविण्याचा प्रयत्न झाल्यास तीव्र आंदोलन करण्यात येईल, असा इशारा ग्रामस्थांनी पुन्हा दिला. यावेळी प्रशासक संदीप अल्हाट, सागर समुद्रवार, बी. एम. राठोड, ज्येष्ठ पत्रकार बाळू वानखेडे, शेख गुलाब, वायरमन विनोद राठोड, निलेश राठोड, तंत्रज्ञ कैलास गिते, प्रवीण भाकरे, पत्रकार नवल राठोड, सागर पायघन, ओम सोनोने, संतोष रोतळे, विनोद मोरे, भीमराव वानखेडे, विश्वास सरदार, शेख गफ्फार, लक्ष्मीबाई पायघन, सिंधुबाई सुर्वे, परमेश्वर गायकवाड यांच्यासह मोठ्या संख्येने वीज ग्राहक उपस्थित होते. दरम्यान, या प्रश्नावरून जानेफळ येथील महावितरण कार्यालयावर मोर्चा काढण्याचा इशारा देण्यात आला होता. मात्र, कनिष्ठ अभियंता अमोल बेंडेवार यांनी स्वतः ग्रामपंचायत कार्यालयात येऊन ग्राहकांच्या समस्या ऐकून घेतल्याने ग्रामस्थांचा वेळ आणि खर्च वाचल्याची भावना व्यक्त करण्यात आली.