क्रांतिकारी शेतकरी संघटनेचे जिल्हाध्यक्ष डॉ. टाले आक्रमक; अधिकाऱ्यांना धरले धारेवर

-मेहकर तालुका कृषी अधिकारी कार्यालयात ठिय्या आंदोलन; शेतकऱ्यांना डीएपी खत तातडीने उपलब्ध करण्याची मागणी

मेहकर (मेहकर प्रतिनिधी) : क्रांतिकारी शेतकरी संघटनेच्या वतीने मेहकर तालुक्यातील शेतकऱ्यांच्या हितासाठी रासायनिक खतांचा पुरेसा साठा उपलब्ध करून देणे, खतांच्या वाढीव दरांवर नियंत्रण ठेवणे तसेच कृषी सेवा केंद्रांकडून होत असलेली “लिंकिंग विक्री” तात्काळ बंद करण्याच्या मागणीसाठी मेहकर तालुका कृषी अधिकारी कार्यालयात तब्बल तीन तास ठिय्या आंदोलन करण्यात आले.

यावेळी संघटनेच्या वतीने तालुका कृषी अधिकाऱ्यांना निवेदन देण्यात आले. “शेतकऱ्यांना कुठल्याही परिस्थितीत डीएपी खत उपलब्ध करून द्या तसेच डीएपीचा बफर स्टॉक तात्काळ रिलीज करा,” अशी मागणी आंदोलनकर्त्यांनी केली.संघटनेचे जिल्हाध्यक्ष डॉ. ज्ञानेश्वर प्रकाश टाले यांनी दिलेल्या निवेदनात नमूद केले की, खरीप हंगामाच्या पार्श्वभूमीवर मेहकर तालुक्यातील अनेक कृषी सेवा केंद्रांवर खतांची कृत्रिम टंचाई निर्माण करून शेतकऱ्यांची आर्थिक लूट केली जात आहे. शासनाने निश्चित केलेल्या दरापेक्षा जास्त दराने खतांची विक्री होत असून अनेक शेतकऱ्यांना खतांसोबत अनावश्यक औषधे व इतर साहित्य खरेदी करण्यास भाग पाडले जात आहे.

तसेच अनेक कृषी सेवा केंद्रांवर खतांचे दरफलक व उपलब्ध साठ्याची माहिती दर्शविणारे फलक नसल्याने शेतकऱ्यांची दिशाभूल होत असल्याचा आरोपही करण्यात आला. या पार्श्वभूमीवर कृषी विभागाने विशेष पथक नेमून तालुक्यातील सर्व कृषी सेवा केंद्रांची नियमित तपासणी करावी, दोषी आढळणाऱ्यांवर कठोर कायदेशीर कारवाई करावी तसेच शासन निर्धारित दरानुसारच खतांची विक्री होत असल्याची खात्री करावी, अशी मागणी करण्यात आली. यावेळी प्रशासनाला इशारा देताना संघटनेच्या पदाधिकाऱ्यांनी सांगितले की, शेतकऱ्यांच्या मागण्यांकडे दुर्लक्ष झाल्यास क्रांतिकारी शेतकरी संघटनेच्या वतीने तीव्र आणि आक्रमक आंदोलन छेडण्यात येईल. त्याची सर्वस्वी जबाबदारी प्रशासनाची राहील, असा इशाराही देण्यात आला. या आंदोलनात गणेश गारोळे, प्रफुल देशमुख, कैलास उतपुरे, नंदकिशोर जाधव, प्रवीण उतपुरे, अनंता पाटील, समाधान खरात, मकसूद खान, सुरेश खरात, गोपाल कुटे यांच्यासह शेतकरी कार्यकर्ते, पदाधिकारी आणि अधिकारी उपस्थित होते.