-नूतन मुंबई टिफिन बॉक्स सप्लायर्स ट्रस्टतर्फे दीड कोटी रुपयांची तीन मजली इमारत उभारणार
आळंदी (अर्जुन मेदनकर) : नूतन मुंबई टिफिन बॉक्स सप्लायर्स चॅरिटी ट्रस्ट व मुंबई टिफिन बॉक्स सप्लायर्स असोसिएशन यांच्या वतीने तीर्थक्षेत्र आळंदी येथे उभारण्यात येणाऱ्या मुंबई डबेवाला धर्मशाळेच्या विस्तारित इमारतीचे भूमिपूजन मोठ्या उत्साहात पार पडले. मुंबईचे आमदार श्रीकांत भारतीय आणि खेड तालुक्याचे आमदार बाबाजीशेठ काळे यांच्या हस्ते या इमारतीचे भूमिपूजन करण्यात आले.
सुमारे एक कोटी पन्नास लाख रुपये खर्चून उभारण्यात येणारी ही नवीन तीन मजली इमारत वारकरी भाविक, चाकरमानी आणि प्रवाशांसाठी मोठी सुविधा ठरणार आहे. वारकरी परंपरा आणि सेवाभाव जपत आळंदी येथे धर्मशाळा उभारण्याचा उपक्रम संघटनेने हाती घेतला असून, या माध्यमातून भाविकांना अधिक चांगल्या सुविधा उपलब्ध करून देण्याचा प्रयत्न करण्यात येत आहे. यावेळी माजी जिल्हा परिषद सदस्य अतुल देशमुख, आळंदी नगर परिषदेचे नगराध्यक्ष प्रशांत कुऱ्हाडे, माजी नगराध्यक्ष राहुल चिताळकर, पंचायत समितीचे माजी सभापती भगवान पोखरकर, पुणे जिल्हा दूध संघाचे माजी संचालक चंद्रशेखर शेटे, पंचायत समिती सदस्या सारिका गोगावले, बाजार समितीचे संचालक अनुराग जैद, खरेदी-विक्री संघाचे संचालक सतीश चांभारे, अॅड. अमृता गुरव, प्रिया पवार, संघटनेचे खजिनदार बारकू फापाळे, रामदास करवंदे, दिंडी मालक माधव रणपिसे, भिमाशंकर सेवा मंडळाचे अध्यक्ष गिरजूशेठ चांभारे, औंढेचे सरपंच प्रदीप शिंदे, वाजवणेचे माजी सरपंच चंद्रकांत आंद्रे यांच्यासह संघटनेचे पदाधिकारी व सभासद मोठ्या संख्येने उपस्थित होते. मुंबई डबेवाला संघटनेची स्थापना सन १८८८ मध्ये वाजवणे गावचे कै. महादू आवजी बच्चे यांनी केली होती. संघटनेचे पहिले अध्यक्ष औदर गावचे कै. धोंडीभाऊ रामभाऊ मेदगे होते. त्यानंतर कै. गंगाराम तळेकर, रघुनाथ मेदगे आणि सबाजी मेदगे यांनी संघटनेच्या वाढीसाठी मोठे योगदान दिले.
