-आमदार सिद्धार्थ खरातांना बैलजोडीची भुरळ; जानेफळ बैल बाजारात मारला फेरफटका
बुलढाणा / मेहकर – (बाळू वानखेडे) : नाही म्हटले तरी बैलांच्या कष्टाची बरोबरी यंत्रांने होऊच शकत नाही. त्यामुळे आजही चांगल्या बैलजोडीची किंमत लाख ते दीड लाख रुपये असल्याचे पाहायला मिळते. काल, १६ मे रोजी आमदार सिद्धार्थ खरात यांनी मेहकर तालुक्यातील जानेफळ येथील बैल बाजारात फेरफटका मारला असता, त्यांनाही अशा देखण्या बैलजोडीची भुरळ पडल्याचे दिसून आले.
आमदार सिद्धार्थ खरात यांनी काल, १६ मे रोजी मेहकर तालुक्यातील जानेफळ येथील बैल बाजारात फेरफटका मारला. यावेळी दोन दात, चार दात व सहा दात असलेले बैल आणि त्यांची पोत पाहताना त्यांना वेगळाच अनुभव आला. शेतकऱ्यांच्या नजरेतून चांगली बैलजोडी कशी असते, हे देखील त्यांनी जाणून घेण्याचा प्रयत्न केला आणि याचा मनसोक्त आनंद घेतला. यावेळी शाम पाटील, संजय सुळकर, संतोष मोहरूत, गजानन राठोड यांच्यासह शिवसेना उद्धव बाळासाहेब ठाकरे पक्षाचे पदाधिकारी, कार्यकर्ते, खरेदीदार व शेतकरी मोठ्या संख्येने उपस्थित होते. आमदार सिद्धार्थ खरात यांना बैल बाजारात पाहून शेतकऱ्यांच्या चेहऱ्यावरही वेगळाच आनंद दिसून येत होता.
