-१९९ रुपयांच्या कार्डासाठी २६०–३०० रुपये वसुली; प्रवाशांची फसवणूक
लोणार (वजीर खान) : एसटी महामंडळाच्या सवलतींचा लाभ घेण्यासाठी अनिवार्य करण्यात आलेले स्मार्ट कार्ड आता प्रवाशांच्या लुबाडणुकीचे साधन ठरत असल्याचे चित्र समोर आले आहे. अधिकृत दर १९९ रुपये असताना अनेक एजन्सीधारकांकडून २६० ते ३०० रुपये वसूल केले जात असून यामुळे नागरिकांमध्ये तीव्र नाराजी व्यक्त होत आहे.
याशिवाय “हा महिना शेवटचा आहे, कार्ड काढले नाही तर प्रवास करता येणार नाही” अशी भीती दाखवून अनेक एजन्सीधारक सवलतधारकांना तातडीने कार्ड काढण्यास भाग पाडत आहेत. प्रत्यक्षात हे कार्ड अनिवार्य करण्याबाबत एसटीकडून कोणतीही अधिकृत अंतिम तारीख जाहीर करण्यात आलेली नसल्याची माहिती आहे. या प्रकारामुळे प्रवाशांमध्ये संभ्रम व संताप वाढला असून प्रशासनाने याकडे गांभीर्याने लक्ष देऊन गैरप्रकार थांबवावेत, अशी मागणी नागरिकांकडून होत आहे.
