– सकाळी मराठवाड्यात ४.७ तर संध्याकाळी चंद्रपुरात ३.४ रिश्टर स्केलची नोंद; सुदैवाने हानी नाही!
वाशिम/हिंगोली (शांताराम पाटील): मंगळवारी राज्याच्या दोन टोकांना भूकंपाचे धक्के बसल्याने नागरिकांमध्ये भीतीचे वातावरण पसरले. सकाळी हिंगोली, नांदेड आणि परभणी जिल्ह्यांना ४.७ रिश्टर स्केल तीव्रतेच्या धक्क्याने हादरवून सोडले, तर संध्याकाळी विदर्भातील चंद्रपूर जिल्ह्यातही भूकंपाची नोंद झाली. सुदैवाने, दोन्ही घटनांमध्ये कोणतीही जीवित किंवा वित्तहानी झाल्याचे वृत्त नाही.
आज सकाळी ८ वाजून ४४ मिनिटांच्या सुमारास हिंगोली जिल्ह्यात भूकंपाचे जोरदार धक्के जाणवले. नांदेड येथील भूकंप मापन केंद्राने या भूकंपाची तीव्रता ४.७ रिश्टर स्केल इतकी नोंदवली आहे. हिंगोली जिल्ह्यासह लगतच्या नांदेड आणि परभणी शहरांतही नागरिकांनी धक्के अनुभवले. काही ठिकाणी घरांवरील पत्रे वाजल्याने आणि भांडी पडल्याने नागरिक घाबरून घराबाहेर आले. या भूकंपाचे पडसाद पश्चिम विदर्भातील वाशिम आणि रिसोड तालुक्यातही उमटले. तेथेही काही सेकंदांसाठी सौम्य धक्के जाणवल्याचे स्थानिक प्रशासनाने सांगितले.
मराठवाडा या धक्क्यातून सावरत असतानाच, संध्याकाळी विदर्भातील चंद्रपूर जिल्हाही भूकंपाने हादरला. चंद्रपूरमधील हार्दोना परिसरात ३.४ रिश्टर स्केल तीव्रतेच्या भूकंपाची नोंद झाली आहे. हा भूकंप सौम्य असला तरी खाणपट्ट्यातील नागरिकांमध्ये काही काळ चिंतेचे वातावरण निर्माण झाले होते.
शनिवारी, ११ एप्रिल २०२६ च्या सकाळी महाराष्ट्रातील विदर्भ आणि मराठवाड्यातील हिंगोली, वाशिम, नांदेड, परभणी आणि चंद्रपूर या जिल्ह्यांत भूकंपाचे धक्के जाणवले. हिंगोली जिल्ह्यातील पांग्रा शिंदे परिसरात केंद्र असलेल्या ४.७ रिश्टर स्केल तीव्रतेच्या या भूकंपाने नागरिक घाबरून घराबाहेर आले, मात्र सुदैवाने कोणतीही जीवितहानी झाली नाही
प्रशासनाचे ‘अलर्ट’ राहण्याचे आवाहन : भूकंपाच्या या दोन घटनांनंतर राज्य प्रशासकीय यंत्रणा सतर्क झाली आहे. जिल्हाधिकाऱ्यांनी आपत्ती व्यवस्थापन विभागाला सज्ज राहण्याचे आदेश दिले आहेत. “प्रशासनाकडून परिस्थितीवर बारकाईने लक्ष ठेवले जात आहे. नागरिकांनी घाबरून न जाता सतर्क राहावे. विशेषतः सोशल मीडियावर पसरणाऱ्या अफवा, बनावट संदेश किंवा फोन कॉल्सवर विश्वास ठेवू नका. कोणतीही माहिती अधिकृत स्त्रोताकडूनच खात्री करून घ्यावी,” असे आवाहन प्रशासनाकडून करण्यात आले आहे.
ठळक मुद्दे:
- हिंगोली (सकाळी ८:४४): ४.७ रिश्टर स्केल (केंद्रबिंदू).
- चंद्रपूर (संध्याकाळी): ३.४ रिश्टर स्केल.
- प्रभावित क्षेत्र: हिंगोली, नांदेड, परभणी, वाशिम, रिसोड आणि चंद्रपूर.
- नुकसान: कोणतीही जीवित किंवा वित्तहानी नाही.
- केंद्रबिंदू: हिंगोली जिल्ह्यातील पांग्रा शिंदे (वसमत) येथे भूकंपाचा केंद्रबिंदू जमिनीखाली १० किमी खोलीवर होता.
