देऊळगाव साखरशा येथील प्राथमिक आरोग्य केंद्रात औषधांचा तुटवडा

मेहकर (तालुका प्रतिनिधी) : तालुक्यातील देऊळगाव साखरशा येथील प्राथमिक आरोग्य केंद्रात आवश्यक औषधसाठा उपलब्ध नसल्याची गंभीर बाब समोर आली आहे. सर्दी व अंगदुखीच्या साध्या गोळ्याही उपलब्ध नसल्याने रुग्णांना खाजगी दवाखान्याचा रस्ता धरावा लागत आहे. तसेच येथे अनेक कर्मचाऱ्यांची पदे रिक्त असून आरोग्य केंद्राच्या इमारतीचीही दुरावस्था झाली आहे. त्यामुळे या गंभीर समस्यांकडे तातडीने लक्ष देऊन औषधसाठा उपलब्ध करून देत इतर अडचणी सोडवाव्यात, अशी मागणी येथील माजी उपसरपंच रणजीत देशमुख यांनी केली आहे. दरम्यान, या संदर्भात आवश्यक उपाययोजना करण्याचे निर्देश संबंधित अधिकाऱ्यांना देण्यात येतील, असे आमदार सिद्धार्थ खरात यांनी सांगितले.

आवश्यक औषधसाठा उपलब्ध नसल्यामुळे प्राथमिक आरोग्य केंद्रातील कर्मचाऱ्यांना रुग्ण व त्यांच्या नातेवाईकांच्या रोषाला सामोरे जावे लागत आहे. शासनाने गरजू व गरीब नागरिकांच्या आरोग्य सुविधांसाठी ठिकठिकाणी आरोग्य केंद्रांची उभारणी केली आहे. या आरोग्य केंद्रांमधून रुग्णांना मोफत प्राथमिक उपचार देण्यात येतात. मात्र देऊळगाव साखरशा येथील प्राथमिक आरोग्य केंद्रात सध्या औषधांचा तुटवडा निर्माण झाला आहे. सर्दी व हातपाय दुखीच्या साध्या गोळ्याही उपलब्ध नसल्याची गंभीर बाब पुढे आली आहे. विशेष म्हणजे शासन आरोग्य यंत्रणेवर कोट्यवधी रुपये खर्च करत असताना प्राथमिक आरोग्य केंद्रात साध्या सर्दी व अंगदुखीच्या गोळ्याही उपलब्ध नसल्याने नागरिकांकडून आश्चर्य व्यक्त केले जात असून रोषही व्यक्त होत आहे. देऊळगाव साखरशा येथील प्राथमिक आरोग्य केंद्र डोंगराळ व दुर्गम भागात असून या केंद्राला सुमारे २४ गावे जोडलेली आहेत. येथे दररोज मोठ्या प्रमाणात रुग्णांची ओपीडी होत असते. मात्र सध्या आवश्यक औषधे उपलब्ध नसल्याने रुग्णांना खाजगी दवाखान्यात जाऊन उपचार घ्यावे लागत आहेत आणि त्यामुळे त्यांच्यावर अतिरिक्त आर्थिक भार पडत आहे.

संबंधित विभागाने या समस्येकडे गांभीर्याने लक्ष देत देऊळगाव साखरशा येथील प्राथमिक आरोग्य केंद्रात मुबलक औषधसाठा उपलब्ध करून द्यावा, जीर्ण इमारतीची दुरुस्ती करावी, सफाई कर्मचारी नियुक्त करावा, संरक्षण भिंत उभारावी तसेच इतर समस्या तातडीने सोडवाव्यात, अशी मागणी माजी उपसरपंच रणजीत देशमुख यांनी केली आहे. याबाबत जिल्हा आरोग्य अधिकाऱ्यांना तातडीने आवश्यक उपाययोजना करण्याचे निर्देश देण्यात येतील, असे आमदार सिद्धार्थ खरात यांनी सांगितले.

दरम्यान, देऊळगाव साखरशा येथील प्राथमिक आरोग्य केंद्राचे वैद्यकीय अधिकारी व फार्मासिस्ट यांच्याशी जिल्हा आरोग्य अधिकारी डॉ. अमोल गीते यांनी तात्काळ संपर्क साधून औषधसाठ्याबाबत विचारपूस केल्याची माहिती मिळाली आहे.

जिल्हा परिषद आरोग्य विभागाच्या स्टॉक रूममध्ये औषधसाठा उपलब्ध असून सध्या तो क्वारंटाईन अवस्थेत आहे. संबंधित औषधे प्राथमिक आरोग्य केंद्रांना वितरित करण्यापूर्वी त्यांची तपासणी करणे आवश्यक असते. त्यासाठी औषधांचे नमुने तपासणीसाठी (NABL) दिल्ली येथील प्रयोगशाळेत पाठविण्यात आले असून अहवाल प्राप्त होताच संबंधित आरोग्य केंद्रांना औषधांचा पुरवठा करण्यात येणार असल्याची माहिती सूत्रांनी दिली आहे.