-बुलडाण्याचा सुपुत्र पवन जायभाये राष्ट्रीय विजेता
-रोहना गावचा सुपुत्र पवन जायभाये यांची राष्ट्रीय स्तरावर दमदार झेप; तीन सुवर्णांसह १४ पदकांची कमाई
देऊळगाव राजा (सुरेश हुसे) : बुलडाणा जिल्ह्यातील देऊळगाव राजा तालुक्यातील रोहना गावचा सुपुत्र पवन बबनराव जायभाये यांनी घोडेस्वारी या क्रीडा प्रकारात राष्ट्रीय स्तरावर उल्लेखनीय यश संपादन करत जिल्ह्याचा मान उंचावला आहे. सध्या ते सीमा सुरक्षा दलात कार्यरत असून ग्वालियर येथील बीएसएफ अकादमीमध्ये देशसेवा बजावत आहेत. कर्तव्य आणि क्रीडा यांचा समतोल साधत त्यांनी राष्ट्रीय स्पर्धांमध्ये सुवर्ण कामगिरी नोंदवली आहे.
राष्ट्रीय स्तरावरील घोडेस्वारी स्पर्धांमध्ये पवन जायभाये यांनी आतापर्यंत तीन सुवर्णपदके जिंकत आपली छाप पाडली आहे. विशेषतः क्रॉस कंट्री प्रकारात उत्कृष्ट संतुलन, अचूक नियंत्रण आणि आत्मविश्वासपूर्ण स्वारीच्या जोरावर त्यांनी सुवर्णपदके पटकावली. याशिवाय सात रजतपदके आणि चार कांस्यपदके मिळवत त्यांनी सातत्यपूर्ण कामगिरीचे दर्शन घडवले आहे. एकूण १४ पदकांची कमाई करत त्यांनी बुलडाणा जिल्ह्याचे नाव राष्ट्रीय पातळीवर उज्ज्वल केले आहे. देशाच्या सीमांची सुरक्षा ही जबाबदारी सांभाळत असतानाच नियमित सराव, शिस्तबद्ध जीवनशैली आणि क्रीडाप्रेम यांच्या बळावर त्यांनी स्वतःला सिद्ध केले आहे. ग्वालियर येथील बीएसएफ अकादमीमध्ये कार्यरत असताना विविध राष्ट्रीय स्तरावरील स्पर्धांमध्ये सहभाग घेत त्यांनी अनेक विजेतेपदे पटकावली आहेत.
पवन जायभाये यांच्या या यशामुळे रोहना गावात आनंदाचे वातावरण निर्माण झाले असून देऊळगाव राजा तालुका आणि संपूर्ण बुलडाणा जिल्ह्यात अभिमानाची भावना व्यक्त होत आहे. ग्रामस्थ, क्रीडाप्रेमी आणि विविध सामाजिक संस्थांकडून त्यांच्यावर अभिनंदनाचा वर्षाव होत आहे. साध्या शेतकरी कुटुंबातून राष्ट्रीय स्तरावर झेप घेणाऱ्या पवन जायभाये यांनी मेहनत, जिद्द आणि देशभक्ती यांच्या बळावर मोठे यश संपादन करता येते, हे दाखवून दिले आहे. भविष्यात आंतरराष्ट्रीय स्तरावर भारताचे प्रतिनिधित्व करण्याची त्यांची क्षमता असल्याचा विश्वास व्यक्त केला जात आहे.
