दिल्लीचा ‘आशीर्वाद’ की पवारांची ‘अदृश्य’ खेळी? राज्यसभा निवडणुकीत सातव्या जागेसाठी पडद्यामागे संशयास्पद खलबतं!

– महाआघाडीत बिघाडीचा धूर, तर भाजपच्या गोटात विजयाचा ‘पाचवा’ पत्ता गुलदस्त्यात; शरद पवारांची प्रतिष्ठा पणाला!
– राज्यसभेच्या रणांगणात राजकीय ‘सस्पेन्स’चा धुरळा; सातव्या जागेसाठी ‘चाणक्यनीती’ की ‘शरणागती’?

मुंबई (बाळू वानखेडे) – महाराष्ट्राच्या राजकारणात सध्या पुन्हा एकदा ‘अदृश्य हाता’ची चर्चा सुरू झाली असून, आगामी राज्यसभा निवडणुकीच्या निमित्ताने भाजप आणि महाविकास आघाडीत पडद्यामागे मोठ्या हालचाली घडताना दिसत आहेत. भाजपने आपल्या चार उमेदवारांची घोषणा करून आपली बाजू सुरक्षित केली असली, तरी खरी खुमखुमी सातव्या जागेसाठी निर्माण झाली आहे. या जागेवर शरद पवारांना राज्यसभेवर धाडण्यासाठी खुद्द भाजपच ‘सॉफ्ट’ भूमिका घेणार की काय? असा खळबळजनक सवाल आता राजकीय वर्तुळात विचारला जात आहे. महाविकास आघाडीत अद्याप एकवाक्यता नसताना भाजपच्या या ‘पवार प्रेमा’मागे नक्की काय गौडबंगाल आहे, याचा उलगडा येत्या २४ तासांत होणार आहे.

राज्यसभेच्या सात जागांसाठी भाजपने रामदास आठवले, विनोद तावडे, माया इवनाते आणि रामराव वडकुते या आपल्या चार ‘शिलेदारांना’ मैदानात उतरवले आहे. संख्याबळाचे गणित पाहता हे चारही जण सहज गुलाल उधळतील, यात शंका नाही. मात्र, खरा पेच सातव्या जागेचा आहे. महाविकास आघाडीमध्ये शरद पवारांच्या उमेदवारीवरून अद्याप धुसफूस सुरू आहे. काँग्रेस आणि ठाकरे गटानेही या जागेवर दावा ठोकल्याने मविआची नौका भरकटलेली दिसतेय. अशातच, जर मविआने पवारांना डावलले, तर भाजप आपला पाचवा उमेदवार न देता पवारांना ‘अदृश्य’ रसद पुरवणार असल्याची चर्चा आहे. हा पवारांचा ‘सन्मान’ आहे की मविआमध्ये फूट पाडण्याची भाजपची नवीन खेळी?

आकडेवारीचा खेळ: कोणाकडे किती ‘दम’?

राज्यसभेची गणिते मांडताना सध्या महायुतीचे पारडे जड दिसत असले, तरी शरद पवारांची मदार मात्र इतरांच्या कुबड्यांवरच अवलंबून आहे.

विदारक वास्तव: शरद पवारांच्या राष्ट्रवादीकडे स्वतःची केवळ १० मते आहेत. निवडून येण्यासाठी त्यांना अजून २६ मतांची गरज लागणार आहे. मविआतील अविश्वासाचा फायदा घेत भाजप आपली अतिरिक्त १६ मते पवारांच्या पदरात टाकून ‘राजकीय मास्टरस्ट्रोक’ लगावण्याच्या तयारीत असल्याचे समजते.

उद्या फैसला! ‘ग्रीन सिग्नल’ कोणाला मिळणार?

अर्ज भरण्यासाठी उद्या, ५ मार्च हा शेवटचा दिवस आहे. जर भाजपने आपला पाचवा उमेदवार मैदानात उतरवला नाही, तर तो शरद पवारांसाठी भाजपचा ‘ग्रीन सिग्नल’ मानला जाईल. पण हा सिग्नल पवारांना दिल्लीच्या वाटेवर नेणार की महाविकास आघाडीच्या शवपेटीवर शेवटचा खिळा ठोकणार, हे पाहणे महत्त्वाचे ठरेल. भाजपचा हा ‘अदृश्य हात’ पवारांच्या गळ्यात विजयाची माळ घालतो की त्यांना राजकीय चक्रव्यूहात अडकवतो, याचे उत्तर उद्या संध्याकाळपर्यंत स्पष्ट होईल!