हत्ता गावातील शेतकऱ्यांच्या शेतातून मोटारपंपचे स्टार्टर व ऑटो स्विच लंपास

लोणार (ऋषी दंदाले): लोणार तालुक्यातील हत्ता गावात अज्ञात चोरट्यांनी शेतकऱ्यांच्या शेतातील मोटारपंपचे स्टार्टर, ऑटो स्विच व इतर अत्यावश्यक साहित्य चोरून नेल्याची घटना १४ फेब्रुवारी २०२६ रोजी उघडकीस आली असून या प्रकारामुळे शेतकऱ्यांमध्ये तीव्र संताप व्यक्त होत आहे.

सध्या परिसरात गहू, हरभरा तसेच शेडनेट पिकांसाठी पाणी देण्याचे काम सुरू असल्याने शेतकरी दिवसरात्र शेतीकडे लक्ष देत आहेत. अशा परिस्थितीत सकाळी सुमारे सात वाजता श्री. अर्जुन बाबुराव गावंडे हे आपल्या शेतातील विहिरीवर मोटार सुरू करण्यासाठी गेले असता पेटीतील स्टार्टर व ऑटो स्विच गायब असल्याचे त्यांच्या निदर्शनास आले. त्यांनी शेजारील शेतकऱ्यांकडे चौकशी केली असता त्यांच्याही शेतातील साहित्य चोरीला गेल्याचे समोर आले. गावातील शेतकऱ्यांनी एकमेकांकडे विचारपूस केली असता जवळपास ११ शेतकऱ्यांचे मोटारपंप स्टार्टर, ऑटो स्विच तसेच पाणीपुरवठ्यासाठी आवश्यक असलेले पान्हे अज्ञात चोरट्यांनी चोरून नेल्याचे स्पष्ट झाले. या चोरीमुळे शेतकऱ्यांचे सुमारे ५० हजार रुपयांचे नुकसान झाले आहे.

या घटनेची माहिती तात्काळ लोणार पोलीस स्टेशनला देण्यात आली. माहिती मिळताच पोलिसांनी घटनास्थळी धाव घेऊन पाहणी केली. फिर्यादी श्री. अर्जुन बाबुराव गावंडे यांच्या तक्रारीवरून लोणार पोलीस स्टेशनमध्ये अज्ञात चोरट्यांविरोधात बी.एन.एस. कलम ३०३ (२) अन्वये गुन्हा दाखल करण्यात आला आहे. लोणार पोलीस स्टेशनचे पोलीस निरीक्षक सदगीर साहेब यांच्या मार्गदर्शनाखाली हेड कॉन्स्टेबल गजानन दराडे, रिंढे साहेब आणि प्रदीप पवार पुढील तपास करीत आहेत. सतत होत असलेल्या अशा चोऱ्यांमुळे शेतकरी वर्गात भीतीचे वातावरण निर्माण झाले असून, चोरट्यांचा तात्काळ बंदोबस्त करण्याची मागणी शेतकऱ्यांकडून होत आहे.