– मालगणी फाटा हादरला; एकलारा गावावर शोककळा
– चिखली–बुलढाणा मार्गावरील हातणीजवळील दुर्देवी घटना
चिखली (तालुका प्रतिनिधी) – वेगाच्या बेफाम स्पर्धेत आणखी एका निष्पाप जीवाचा बळी गेला. चिखली–बुलढाणा मार्गावरील मालगणी फाटा (हातणी जवळ) येथे आज (दि.12) सकाळी सुमारे सव्वा नऊच्या सुमारास झालेल्या भीषण अपघातात दुचाकीस्वार तरुणाचा चिरडल्याने जागीच दुर्दैवी मृत्यू झाला. शंतनू नारायण अंभोरे (वय २१, रा. एकलारा ता. चिखली) असे मृत युवकाचे नाव असून, तो परीक्षा देण्यासाठी जात असताना काळाने त्याच्यावर झडप घातली.
मृतदेह शवविच्छेदनासाठी उपजिल्हा रुग्णालय, चिखली येथे पाठविण्यात आला. तेथे उत्तरीय तपासणी करण्यात आल्यानंतर तो नातेवाईकांच्या सुपूर्त करण्यात आला. या प्रकरणी ट्रक चालकास ताब्यात घेण्यात आले असून, चिखली पोलिसांकडून पुढील तपास सुरू आहे. दरम्यान, एकुलत्या एक मुलाच्या निधनाने एकलारा गावावर शोककळा पसरली असून, परिसरात हळहळ व्यक्त होत आहे. वेगाच्या बेफाम धावणाऱ्या वाहनांवर नियंत्रण कधी येणार, असा संतप्त सवाल नागरिकांकडून उपस्थित केला जात आहे.
