-नैसर्गिक झरे, पर्यावरणीय समतोल आणि ऐतिहासिक वारशाच्या संवर्धनाचा प्रश्न ऐरणीवर
लोणार (वाजिद खान) : जागतिक कीर्तीच्या खाऱ्या पाण्याच्या लोणार सरोवरातील वाढती पाणी पातळी ही गंभीर बाब ठरत असतानाही शासनस्तरावरून दीर्घकाळ दुर्लक्ष होत होते. अखेर मुंबई उच्च न्यायालयाच्या नागपूर खंडपीठाने स्वतः पुढाकार घेत याचिका दाखल करून घेतल्यानंतर जिल्हा प्रशासन खडबडून जागे झाले. त्यानंतर जिल्हाधिकारी डॉ. किरण पाटील यांनी २४ जानेवारी रोजी लोणार सरोवराची प्रत्यक्ष पाहणी केली.
पाहणीदरम्यान सरोवरातील पाण्याची पीएच पातळी तपासण्यात आली. पोटॅशियम हायड्रोजन पेपरच्या साहाय्याने केलेल्या तपासणीत पीएच लेव्हल ११ च्या वर असल्याचे निष्पन्न झाले. याचा अर्थ या पाण्यात कोणतेही जलचर जीव जगू शकत नाहीत, असे जिल्हाधिकारी पाटील यांनी स्पष्ट केले. सरोवरात मासे आढळल्याच्या चर्चांचेही त्यांनी खंडन केले. तसेच सर्व झऱ्यांतून प्रति सेकंद किती पाणी येते, याचे मोजमापही करण्यात आले. दरम्यान, मुंबई येथील आयआयटीमधील शास्त्रज्ञांमार्फत सखोल संशोधन करण्यात येणार असून, त्यासाठी ५० लाख रुपयांचा निधी मंजूर झाल्याची माहिती जिल्हाधिकाऱ्यांनी दिली. धारतीर्थ व रामगया या झऱ्यांचे गोड पाणी पंपाद्वारे नगरपालिकेच्या फिल्टरपर्यंत नेल्यास ते पिण्यासाठी वापरता येऊ शकते, असेही त्यांनी नमूद केले. मात्र सरोवर व परिसर वन्यजीव विभागाच्या अखत्यारीत येत असल्याने पाणी लिफ्टिंगसाठी वनविभागाची ना-हरकत आवश्यक असून, परवानगी मिळाल्यानंतरच पुढील कार्यवाही केली जाणार असल्याचे जिल्हाधिकारी डॉ. किरण पाटील यांनी स्पष्ट केले.
