-इतिहास, निसर्ग, शेती आणि आधुनिक पायाभूत सुविधांचा अभूतपूर्व संगम
पुणे (अर्जुन मेदनकर) : दरवर्षी २५ जानेवारी हा दिवस देशभरात ‘राष्ट्रीय पर्यटन दिन’ म्हणून साजरा केला जातो. पर्यटनाच्या माध्यमातून देशाचा सांस्कृतिक, ऐतिहासिक व नैसर्गिक वारसा जपणे, स्थानिक अर्थव्यवस्थेला चालना देणे आणि भारताची जागतिक ओळख अधिक मजबूत करणे हा या दिवसामागचा प्रमुख उद्देश आहे. पर्यटन म्हणजे केवळ प्रवास नसून तो संस्कृतीचा संवाद, इतिहासाची ओळख आणि निसर्गाशी नातं निर्माण करणारा अनुभव आहे.
‘पुणे ग्रँड टूर’मुळे रस्ते, कनेक्टिव्हिटी, पर्यटन सुविधा आणि ग्रामीण पायाभूत विकासाला गती मिळणार असून याचा थेट फायदा स्थानिक अर्थव्यवस्थेला होणार आहे. होमस्टे, स्थानिक मार्गदर्शक, हस्तकला, खाद्यसंस्कृती आणि युवकांसाठी रोजगाराच्या नव्या संधी निर्माण होणार आहेत. राष्ट्रीय पर्यटन दिनाच्या निमित्ताने पुणे जिल्हा आता केवळ राज्य किंवा देशापुरता मर्यादित न राहता जागतिक पर्यटन नकाशावर स्वतःची स्वतंत्र ओळख निर्माण करत असल्याचे स्पष्ट होत आहे. ‘पुणे ग्रँड टूर’ ही स्पर्धा पुण्याच्या पर्यटन विकासाच्या इतिहासातील एक महत्त्वाचा टप्पा ठरली असून, भविष्यात जिल्ह्याला पर्यटनाच्या सुवर्णकाळात घेऊन जाणारी ठरेल, असा विश्वास जिल्हा माहिती अधिकारी युवराज पाटील यांनी व्यक्त केला आहे.
