–पत्रकार दिनानिमित्त धार्मिक-सामाजिक उपक्रमांचा संगम
आळंदी (अर्जुन मेदनकर) : हुतात्मा राजगुरू पत्रकार संघाच्या वतीने ‘पत्रकार दिना’चे औचित्य साधून तीर्थक्षेत्र अलंकापुरीत विविध धार्मिक व सामाजिक उपक्रम राबविण्यात आले. श्री संत ज्ञानेश्वर महाराज संजीवन समाधी मंदिरात माऊलींच्या पादुकांचे पूजन करून पत्रकार बांधवांनी माऊलींच्या चरणी नतमस्तक होत सत्यनिष्ठ पत्रकारितेसाठी आशीर्वाद मागितले. त्यानंतर सिद्धबेटावर वृक्ष संवर्धनाचा संकल्प करत पर्यावरण रक्षणाचा संदेश देण्यात आला.
मंदिरातील कार्यक्रमानंतर सकाळी ८ वाजता सर्व पत्रकार बांधवांनी श्री संत लीलाभूमी सिद्धबेट येथे भेट दिली. येथे पवित्र अजानवृक्षाची पूजा करून निसर्ग संवर्धन व पर्यावरण संरक्षणाबाबत चर्चा करण्यात आली. पत्रकारिता करतानाच सामाजिक उत्तरदायित्व म्हणून पर्यावरण रक्षणासाठी योगदान देणे आवश्यक असल्याचे मत यावेळी अर्जुन मेदनकर यांनी व्यक्त केले. गेल्या चार वर्षांपासून सिद्धबेट परिसरात वृक्षारोपण व संवर्धनाचे कार्य सुरू असून ही हरित संपदा जपणे काळाची गरज असल्याचे त्यांनी सांगितले. या प्रसंगी उपस्थित सर्व पत्रकार बांधव व मान्यवरांना पत्रकार दिनाच्या हार्दिक शुभेच्छा देण्यात आल्या. हुतात्मा राजगुरू पत्रकार संघाच्या वतीने सर्व पाहुण्यांचे उत्साहात स्वागत करण्यात आले. अलंकापुरीतील कार्यक्रम यशस्वीरीत्या पार पडल्यानंतर पत्रकार संघाचा पुढील नियोजित मुंबई दौऱ्यासाठी प्रस्थान करण्यात आले. या उपक्रमामुळे पत्रकारितेसोबत अध्यात्म आणि पर्यावरण रक्षणाचा सुंदर संगम आळंदीत अनुभवायला मिळाला.
