-तालुक्यातील धक्कादायक घटना, पोलिस ठाण्यात गुन्हा दाखल
सिंदखेडराजा (सुरेश हुसे) : तालुक्यातील एका गावात दोन अल्पवयीन मुलांनी एका ११ वर्षीय अल्पवयीन मुलीवर अतिप्रसंग करण्याचा प्रयत्न केल्याची धक्कादायक घटना दि. २३ डिसेंबर रोजी दुपारी घडली. या प्रकरणी दि. २४ डिसेंबर रोजी तालुक्यातील एका पोलिस ठाण्यात गुन्हा दाखल करण्यात आला असून, या घटनेमुळे संपूर्ण तालुक्यात खळबळ उडाली आहे.
संस्कार, सामाजिक जाणीव आणि बालसुरक्षेच्या दृष्टीने अत्यंत गंभीर असलेल्या या प्रकारामुळे नागरिकांमध्ये तीव्र चिंता व्यक्त केली जात आहे. “इतक्या लहान वयात अशी विकृती कशी निर्माण होते?” असा प्रश्न उपस्थित होत आहे. पीडित मुलीच्या ३५ वर्षीय आईने दिलेल्या तक्रारीनुसार, तालुक्यातील एका गावात, कनिष्ठ महाविद्यालयाच्या शेजारी हे कुटुंब वास्तव्यास आहे. घटनेच्या दिवशी दुपारी सुमारे दोन वाजताच्या सुमारास ११ वर्षीय मुलगी घरात एकटी झाडझूड करीत असताना, शेजारी राहणारे अंदाजे १४ व १५ वर्षे वयाचे दोन अल्पवयीन मुलगे तिच्या घरी आले.
तक्रारीनुसार, यावेळी १४ वर्षीय अल्पवयीन मुलाने मुलीवर अतिप्रसंग करण्याचा प्रयत्न केला, तर दुसरा अल्पवयीन मुलगा बाहेर राखण करत उभा होता. घटनेनंतर मुलीने आपल्या आईकडे शारीरिक वेदनांची तक्रार केल्याने आईला संशय आला. तिने मुलीला विश्वासात घेत चौकशी केली असता, मुलीने घडलेला संपूर्ण प्रकार कथन केला. यानंतर आईने तत्काळ तालुक्यातील पोलिस ठाण्यात जाऊन सहाय्यक पोलिस निरीक्षकांसमोर तक्रार दाखल केली. या तक्रारीच्या आधारे पोलिसांनी अप.क्र. ३५४/२०२५ नुसार भारतीय न्याय संहिता कलम ६४(२)(i), ६५(२), ३५१(३), ३(५) अंतर्गत दोन्ही अल्पवयीन मुलांविरोधात गुन्हा दाखल केला आहे. पुढील तपास ठाणेदार व त्यांचे सहकारी करीत आहेत.
एका अल्पवयीन मुलीवर दोन अल्पवयीन मुलांनी अतिप्रसंगाचा प्रयत्न केल्याची ही घटना केवळ गुन्हा नसून समाजमनाला अंतर्मुख करणारी ठरली आहे. वाढती बालविकृती, पालकांचे दुर्लक्ष, मोबाईल व डिजिटल संस्कृतीचा प्रभाव आणि सामाजिक जबाबदारी यावर पुन्हा एकदा गंभीर चर्चा सुरू झाली असून, समाज म्हणून आपण कुठे चाललो आहोत? हा प्रश्न उपस्थित झाला आहे.
