जानकीदेवी विद्यालयाच्या राष्ट्रीय सेवा योजना शिबिराचे कोनड खुर्द येथे उद्घाटन

-विद्यार्थी घडवणुकीसाठी रा.से.यो. शिबिर महत्त्वाचे – मान्यवरांचे मत

देऊळगाव घुबे (राजेंद्र घुबे) : भारत शिक्षण प्रसारक मंडळद्वारा संचालित जानकीदेवी विद्यालयाच्या राष्ट्रीय सेवा योजना (रा.से.यो.) शिबिराचे दत्तक गाव कोनड खुर्द येथे उत्साहात उद्घाटन करण्यात आले. या कार्यक्रमाच्या अध्यक्षस्थानी विद्यालयाचे अध्यक्ष शेनफडराव घुबे होते, तर उद्घाटक म्हणून विवेकानंद विद्यालयाचे सचिव एस. टी. गोरे यांनी उपस्थिती दर्शविली.

यावेळी अंढेरा पोलीस स्टेशनचे ठाणेदार रुपेश शक्करगे, कोनड खुर्दचे सरपंच संजय वानखेडे, तंटामुक्ती समितीचे अध्यक्ष सिद्धार्थ वानखेडे, पोलिस पाटील रंगनाथ जावळे, माजी सरपंच पंजाबराव जावळे यांच्यासह ग्रामस्थ, शिक्षकवृंद व मान्यवर मोठ्या संख्येने उपस्थित होते. उद्घाटनप्रसंगी बोलताना एस. टी. गोरे यांनी राष्ट्रीय सेवा योजना शिबिराच्या माध्यमातून विद्यार्थ्यांमध्ये सामाजिक भान निर्माण होते. याच माध्यमातून आदर्श विद्यार्थी आणि जबाबदार नागरिक घडतो, असे प्रतिपादन केले. त्यांनी स्वामी विवेकानंद आणि महात्मा गांधी यांच्या जीवनकार्याचा उल्लेख करत समाजसेवेचे महत्त्व अधोरेखित केले.

ठाणेदार रुपेश शक्करगे यांनी विद्यार्थी दशेतच समाज व देशाच्या विकासाच्या दृष्टीने अशा उपक्रमांची आवश्यकता असल्याचे सांगत, आपल्या जीवनातील अनुभव उपस्थित विद्यार्थ्यांसमोर मांडले. अध्यक्षीय भाषणात शेनफडराव घुबे यांनी रा.से.यो. शिबिर हे श्रमप्रतिष्ठा, स्वावलंबन तसेच नैतिक व आध्यात्मिक जागृतीचे प्रभावी माध्यम असल्याचे सांगितले. जानकीदेवी विद्यालय विद्यार्थ्यांच्या सर्वांगीण विकासासाठी कटिबद्ध असल्याचेही त्यांनी स्पष्ट केले. कार्यक्रमाचे प्रास्ताविक प्रा. गजानन मिसाळ यांनी केले, तर कार्यक्रमाची रूपरेषा प्रा. उद्धव घुबे यांनी मांडली. सूत्रसंचालन कु. अनुराधा दरेकर व कु. खुशी जाट यांनी केले. कार्यक्रमाच्या यशस्वीतेसाठी प्रा. डी. व्ही. थुट्टे, प्रा. अमोल डुकरे, प्रा. चव्हाण, प्रा. कऱ्हाडे, प्रा. संतोष मिसाळ, पूनम पाडोळे मॅडम यांच्यासह शिक्षकवृंदाने परिश्रम घेतले.