– न्यायालयीन कोठडीतून पोलिस संरक्षणात येऊन दाखल केला निवडणूक अर्ज
– काँग्रेसने उमेदवारी नाकारल्यानंतर अजितदादांच्या राष्ट्रवादीचे मिळवले तिकीट!
चिखली (राजेश लोखंडे) – पत्नीला पेट्रोल ओतून जीवंत जाळण्याचा प्रयत्न करणार्या चिखली शहर युवक काँग्रेसचा अध्यक्ष असलेल्या विशाल उर्फ रिकी काकडे याला अजितदादा पवार यांच्या सत्ताधारी राष्ट्रवादी काँग्रेसने उमेदवारी दिल्याने चिखली शहरात खळबळ उडाली आहे. विशाल काकडे हा प्रथम काँग्रेसकडून निवडणूक लढवणार होता. पण त्याचा अर्ज फेटाळण्यात आल्याने राष्ट्रवादीने ऐनवेळी त्याला उमेदवारी देऊन आपल्या गोटात ओढले. विशाल काकडे याने न्यायालयाच्या परवानगीने नगरपरिषद निवडणुकीत प्रभाग १३ अ मधून उमेदवारी अर्ज दाखल केला असून, त्याने न्यायालयीन कोठडीत असताना पोलिस संरक्षणात येऊन निवडणूक निर्णय अधिकार्यांकडे आपला उमेदवारी अर्ज दाखल केला.
यासंबंधीच्या माहितीनुसार, विशाल काकडे व त्यांची पत्नी नमिता काकडे यांचा २०२० मध्ये विवाह झाला होता. त्यांना ३ व १ वर्षांची २ मुले आहेत. नमिता काकडे नगरपरिषदेत कामगार म्हणून काम करत होत्या. त्यांना आपल्या पतीच्या चारित्र्यावर संशय होता. त्यातच नवर्याच्या फोनमध्ये मुलींचे मेसेजेस पाहून त्यांचा संशय अधिकच बळावला. त्यातून दोघांत टोकाचा वाद झाला. अखेर विशाल काकडे याने पत्नीच्या अंगावर पेट्रोल ओतून तिला पेटवून देण्याचा प्रयत्न केला. पण नमिताने वेळीच स्वतःला सावरत पाण्याच्या ड्रममध्ये आपली साडी टाकून आग विझवली. यामुळे पुढील अनर्थ टळला. या घटनेनंतर त्यांनी चिखली शहर पोलिस ठाण्यात धाव घेऊन आपल्या पतीविरोधात तक्रार दाखल केली. या तक्रारीवरून पोलिसांनी गुन्हा दाखल केला असून, आरोपी सद्या न्यायालयीन कोठडीत आहे.
