– मेहकर, लोणार तालुक्यांत यावर्षी बरसला १०० मिलीमीटरच्यावर पाऊस; लाखो एकरावरील पिके उद्ध्वस्त; केंद्रीय मंत्र्यांच्याच तालुक्यांना शासनाने दाखविला ठेंगा!
– मेहकर, लोणार तालुक्यांचा विशेष पॅकेजमध्ये समावेश करणारच – आमदार सिद्धार्थ खरात
बुलढाणा (बाळू वानखेडे) – राज्यात जून ते सप्टेंबर २०२५ या दरम्यान अतिवृष्टी व पुरामुळे झालेल्या नुकसानीसाठी मुख्यमंत्री देवेंद्र फडणवीस यांनी परवा, दि. ७ ऑक्टोबररोजी ३१ हजार कोटीच्यावर रकमेचे विशेष मदत पॅकेज जाहीर केले. त्यामुळे शेतकर्यांना काहीसे हायसे वाटले. आता याबाबत आज, दि.९ ऑक्टोबररोजी शासन निर्णय जारी झाला असून, या विशेष मदत पॅकेजमधून जिल्ह्यातील मेहकर, लोणार, संग्रामपूर व जळगाव जामोद या चार तालुक्यांना वगळण्यात आले आहे. विशेष म्हणजे, जून महिन्यात मेहकर व लोणार तालुक्यात ढगफुटीसदृश पाऊस होऊन या दोन तालुक्यांत लाखाच्यावर एकरावरील पिके नेस्तनाबूत झाली होती. जमीनही मोठ्या प्रमाणात खरडून गेली होती. तर शासकीय मालमत्तेचेसुध्दा मोठे नुकसान झाले होते. इतके नुकसान होवूनही सदर पॅकेजचा फायदा होणार नसल्याने शेतकरी संताप व्यक्त करत आहेत. विशेष म्हणजे, वगळण्यात आलेले तालुके केंद्रीय मंत्री प्रतापराव जाधव यांचे असून, त्यांनी सप्टेंबरमधील अतिवृष्टीची पाहणी करून शेतकर्यांना सरकारकडून भरघोस आर्थिक मदत मिळवून देण्याची ग्वाही दिली होती. परंतु, सरकारने त्यांना चांगलाच झटका दिला असल्याचे दिसून येत आहे. तर तालुक्यांचा सदर पॅकेजमध्ये समावेश करणारच अशी ठाम ग्वाही आमदार सिद्धार्थ खरात यांनी ‘ब्रेकिंग महाराष्ट्र’शी बोलताना दिली.
.शासनाचा जीआर वाचण्यासाठी येथे क्लीक करा..
राज्यातील फडणवीस सरकारने दिलेल्या विशेष मदत पॅकेजमधून माजी मंत्री आ. संजय कुटे व केंद्रीय मंत्री प्रतापराव जाधव यांचेच तालुके नेमके वगळण्यात आले आहेत. आ. संजय गायकवाड, आ. श्वेताताई महाले पाटील, आ. मनोज कायंदे व मंत्री आकाश फुंडकर यांच्या तालुक्यांना मात्र या विशेष मदत पॅकेजमध्ये स्थान मिळालेले आहे. त्यामुळे, या दोन नेत्यांचा राजकीय गेम करून त्यांच्या मतदारसंघातील शेतकरी वार्यावर सोडण्यात आले आहे का, अशी राजकीय चर्चादेखील जिल्ह्यात सुरू होती.
विशेष म्हणजे, दि. २५ व २६ जूनरोजी मेहकर व लोणार तालुक्यात ढगफुटीसदृश पाऊस झाला, या पावसाने लाखाच्यावर एकरावरील पिके उद्ध्वस्त झाली तर शेकडो हेक्टर जमीन खरडून गेली. तसेच शासकीय मालमत्तेचेही मोठे नुकसान झाले. केंद्रीय मंत्री प्रतापराव जाधव, जिल्हाधिकारी डॉ. किरण पाटील, आमदार सिद्धार्थ खरातसह इतरांनी नुकसानीची पाहणीदेखील केली होती व शेतकर्यांना भरीव मदत देऊ, अशी ग्वाहीदेखील दिली होती. याबाबतचा वेळोवेळी पाठपुरावादेखील करण्यात आला. तर आमदार सिद्धार्थ खरात यांनी विधानसभेत सदर समस्या पोटतिडकीने मांडली होती व विशेष पॅकेजची मागणी मुख्यमंत्र्यांकडे केली होती. परवा मुख्यमंत्री देवेंद्र फडणवीस यांनी जाहीर केलेल्या विशेष मदत पॅकेजमध्ये अतिवृष्टीने मोठे नुकसान होऊनही मेहकर व लोणार या तालुक्यांना वगळल्याने शेतकर्यांमधून संताप व्यक्त होणे स्वाभाविक आहे. विशेष म्हणजे, या दोन्ही तालुक्यांत आतापर्यंत १०० मिलीमीटरच्यावर पाऊस बरसला. याबाबत मेहकर निवासी, जिल्ह्याचे खासदार तथा केंद्रीय राज्यमंत्री मंत्री प्रतापराव जाधव, आमदार सिद्धार्थ खरात यांनी पक्षभेद विसरून शेतकर्यांसाठी एकीने शासनाकडे आणखी पाठपुरावा करून शेतकर्यांना धीर द्यावा, अशी रास्त मागणी आता होऊ लागली आहे.
याबाबत आमदार सिद्धार्थ खरात यांना विचारले असता, मेहकर व लोणार तालुक्यांचा समावेश सदर विशेष मदत पॅकेजमध्ये करणारच, अशी ठाम ग्वाही त्यांनी ‘ब्रेकिंग महाराष्ट्र’शी बोलताना दिली आहे.
