– मतदारयाद्या नव्याने तयार करण्याचे राज्य निवडणूक आयोगाचे आदेश!
– महायुती व महाआघाडीकडून जागावाटपांचीही चाचपणी सुरू!
मुंबई/बुलढाणा (बाळू वानखेडे) – राज्यातील पुढीलवर्षी मुदत संपणार्या नागपूर, पुणे, औरंगाबाद विभाग पदवीधर मतदारसंघ तसेच अमरावती व पुणे विभाग शिक्षक मतदार संघासाठी निवडणूक होणार आहे. त्यादृष्टीने निवडणूक आयोग कामाला लागला असून, याबाबत राज्य निवडणूक आयोगाने संबंधित विभागीय आयुक्त यांना सदर निवडणुकीसाठी मतदारयाद्या नव्याने तयार करण्याचे आदेश दि.१२ सप्टेंबररोजी दिले आहेत. यापूर्वी ही निवडणूक नोव्हेंबर 2020 मध्ये झाली होती. त्यात महाविकास आघाडीचा वरचष्मा दिसून आला होता. आता या जागा जिंकण्यासाठी सत्ताधारी महायुतीने जोरदार कंबर कसली आहे.
- – राज्यात आता शिक्षक आणि पदवीधर मतदारसंघांच्या आगामी निवडणुकांच्या पार्श्वभूमीवर महायुतीतील जागावाटप सुरू झाल्याचे पाहायला मिळत आहे. आगामी निवडणुकीच्या अनुषंगाने महाविकास आघाडीनेदेखील प्रयत्न सुरू केले आहेत. काँग्रेसचे नेते विजय वडेट्टीवार आणि बाळासाहेब थोरात यांनी नुकतीच ‘मातोश्री’वर जाऊन शिवसेना पक्षप्रमुख उद्धव ठाकरे यांची भेट घेतली होती.
- – पुणे शिक्षक मतदार संघातून जयंत आसगावकर, पुणे पदवीधर मतदारसंघातून अरूण लाड, नागपूर पदवीधर मतदारसंघातून अभिजित वंजारी, औरंगाबाद पदवीधर मतदारसंघातून सतिष चव्हाण तर अमरावती शिक्षक मतदार संघातून किरण सरनाईक निवडून आलेले असून, यातील बहुतांश आमदार हे महाविकास आघाडीचे आहेत.
राज्यात विधान परिषद या वरिष्ठ सभागृहाचे एकूण 78 सदस्य आहेत. यातले 31 सदस्य म्हणजे विधानसभेतले आमदार निवडून देतात, 21 सदस्य स्थानिक स्वराज्य संस्थांमधून निवडले जातात. तर 12 जणांची नेमणूक राज्यपालांकडून होते आणि 7 उमेदवार शिक्षक मतदारसंघातून तर 7 पदवीधर मतदारसंघातून येतात. हे पदवीधर मतदारसंघ आहेत मुंबई, कोकण, पुणे, औरंगाबाद, नाशिक, नागपूर आणि अमरावती. विधान परिषदेत दर दोन वर्षांनी एक तृतीयांश सदस्य निवृत्त होत असतात आणि त्यांच्या जागी नवीन निवडणूक होते.
